Aşgabat şäherindäki Halkara ylmy-tehnologiýa parkynyň binasynda Halkara zenanlar güni mynasybetli «Zenan we tebigat» atly döredijilik duşuşygy geçirildi. Çäräniň guramaçysy «Ýaş tebigatçy» jemgyýetçilik guramasy boldy.

 

Duşuşyk BMG-niň Ösüş maksatnamasynyň Türkmenistandaky «Milli derejede kesgitlenen goşantlary (MDKG 3.0) täzelemek işine goldaw bermek» taslamasynyň tehniki goldawy bilen, Türkmenistanyň BMG-niň Howanyň üýtgemegi boýunça Çarçuwaly konwensiýasy hem-de Pariž ylalaşygy boýunça borçnamalarynyň çäginde geçirildi.

 

Çäre kyrk töweregi gatnaşyjyny bir ýere jemledi. Duşuşygyň dowamynda Türkmenistanyň Daşky gurşawy goramak ministrliginiň wekilleri çykyş edip, jemgyýetde ekologiýa medeniýetini kemala getirmekde zenanlaryň möhüm ornuny aýratyn bellediler.

 

Bilim, saglygy goraýyş we köpçülikleýin habar beriş serişdeleri ulgamynda zähmet çekýän zenan hünärmenleriň hormatly myhman hökmünde gatnaşmagy çärä aýratyn many-mazmun berdi. Olar özleriniň hünär tejribesi hem-de daşky gurşawy goramak baradaky garaýyşlary bilen paýlaşdylar.

 

«Ýaş tebigatçy» jemgyýetçilik guramasynyň ýolbaşçysy Leýli Şyhmedowa çykyşynda şeýle belledi:

«Ýurdumyzda zenanlaryň jemgyýetdäki orny ýokary derejede sarpalanýar. Zenan bilen tebigat — durmuşyň we gözelligiň bitewi çeşmesidir. Esasy maksadymyz bu sazlaşygy ýaşlaryň aňynda berkidip, olarda tebigata bolan aýawly garaýşy terbiýelemekdir».

 

BMGÖM-niň hünärmenleri we ýaş ekologiýa meýletinçileri howanyň üýtgemegi boýunça halkara borçnamalary hem-de bu ugurda durmuşa geçirilýän taslamalar barada pikir alyşdylar. Guramanyň agzalary hünärmenler bilen işjeň dialoga girip, özlerini gyzyklandyrýan sowallara giňişleýin jogap aldylar.

 

Duşuşygyň ahyrynda guramaçylar tarapyndan gatnaşyjylara ýadygärlik sowgatlar dabaraly ýagdaýda gowşuryldy. Çäre ýaş gelin-gyzlaryň ekologiýa başlangyçlaryny goldamak we tejribe alyşmak üçin netijeli meýdança boldy.