Ahal welaýatynyň Babadaýhan etrabynyň meýdanlarynda ýazky gowaça ekişine taýýarlyk işleri batly depginlerde alnyp barylýar. Şu ýyl etrabyň ekerançylary 24 müň gektar meýdana gowaça ekmegi meýilleşdirýärler. Döwlet maksatnamalaryndan we döwlet Baştutanymyzyň görkezmelerinden ruhlanan oba zähmetkeşleri ähli taýýarlyk işlerini agrotehniki möhletlerde tamamlamaga çalyşýarlar.

Häzirki wagtda etrapda sürüm ýerlerini tekizlemek, mineral we organiki dökünleri ulanmak boýunça toplumlaýyn işler geçirilýär. Tohumlaryň hiline we tehnikalaryň abatlygyna aýratyn üns berilýär. «Obahyzmat» kärhanasynyň hünärmenleri eýýäm 50 sany häzirki zaman ekiş tehnikasyny möwsüme doly taýýarladylar. Tejribeli mehanizator Begenç Kitjaýew we kärendeçi Hožaberdi Berdiýew ýaly ussatlar özleriniň netijeli zähmeti bilen ýaşlara görelde bolýarlar.

Meýdanlary bejermek bilen bir hatarda, suwaryş akabalaryny arassalamak we meýdanlaryň gyrasyndaky ýabany gyrymsy agaçlary aýyrmak işleri hem utgaşykly alnyp barylýar. Bu çäreler zyýanly mör-möjeklere garşy netijeli göreşmäge we bökdençsiz suwaryşy üpjün etmäge mümkinçilik berýär. Şeýle hem geljekki hasyly goramak üçin bio-kärhanalaryň mümkinçilikleri giňden ulanylýar. Obanyň maddy-tehniki binýadynyň täze ekskawatorlar, buldozerler we traktorlar bilen berkidilmegi ähli işleriň ýokary hilli ýerine ýetirilmegine şert döredýär.