Hytaýly alymlar şäher yşyklandyryş ulgamynda düýpli öwrülişik etjek täsin oýlap tapyşy — garaňkyda öz-özünden ýagtylyk saçýan genetiki taýdan üýtgedilen ösümlikleri tanyşdyrdylar. Futurism neşiriniň maglumatyna görä, bu innowasiýa elektrik energiýasyny sarp etmezden seýilgähleri we dynç alyş zolaklaryny yşyklandyrmaga mümkinçilik berer. Täze taslama ekologiýa taýdan arassa şäher gurşawyny kemala getirmäge we tebigaty döwrebap tehnologiýalar bilen utgaşdyrmaga gönükdirilendir.

Tehnologiýanyň özeni ýaldyrawuk tomzaklaryň we käbir kömelekleriň şöhle saçyjy genlerini ösümlikleriň öýjüklerine ýerleşdirmekden ybaratdyr. Häzirki wagta çenli günbakar, orhideýa we hrizantema ýaly ösümlikleriň 20-den gowrak görnüşinde synaglar şowly geçirilipdir. Taslamany esaslandyryjy Li Ženhan bu ösümliklerden emele geljek ýagty jülgeleriň meşhur «Awatar» kinosyndaky täsin dünýäni ýatlatjakdygyny belleýär.

Alymlar ýagtylyk öndürmegiň iki sany esasy usulyny öňe sürýärler. Birinji usulda ösümlik doly özbaşdak ýagtylyk saçýar, munuň üçin oňa diňe adaty ideg (suw we dökün) gerek bolýar. Ikinji usulda bolsa, ösümlikleriň ýapraklaryna gün energiýasyny toplaýjy ýörite metal bölejikleri ornaşdyrylýar. Bu bölejikler gündizine toplan energiýasyny gijesine yşyk görnüşinde yzyna goýberýärler, şunlukda ýagtylygyň reňkini hem islege görä üýtgedip bolýar.

Bu innowasion başlangyç elektrik energiýasyny tygşytlamaga we şäherleriň ekologiýasyny gowulandyrmaga ýardam eder. Janly «çyralar» diňe bir yşyklandyryş hyzmatyny ýerine ýetirmen, eýsem howany arassalamaga we şäher bezegine täzeçe öwüşgin bermäge mümkinçilik döreder. Tiz wagtdan Hytaýyň uly şäherlerinde peýda boljak bu tebigy yşyklandyryş usuly bütin dünýäniň biotehnologiýa ulgamyndaky nusgalyk tejribesine öwrüler.