Gazagystan Respublikasynyň hökümeti ýurduň ykdysady kuwwatyny artdyrmak we daşary ýurt maýasyny çekmek maksady bilen, "Altyn wiza" diýlip atlandyrylýan täze migrasiýa maksatnamasyny ornaşdyrmagy meýilleşdirýär. Bu başlangyç barada ýurduň Medeniýet we habar beriş ministri Aida Balaýewa resmi maglumat berdi. Täze ulgam ýurduň ösüşi üçin ileri tutulýan ugurlarda zähmet çekýän hünärmenlere ýaşamak we işlemek üçin aýratyn ýeňillikleri döretmegi göz öňünde tutýar.

Maksatnamanyň esasy aýratynlygy resminamalaryň resmileşdirilişiniň doly sanly ulgama geçirilmegidir. Hünärmenler we maýadarlar "bir penjire" ýörelgesi esasynda ähli zerur rugsatnamalary gysga wagtyň içinde alyp bilerler. Bu çäre diňe bir wagt tygşytlaman, eýsem býurokratik bökdençlikleri hem aradan aýyrmaga gönükdirilendir. Şeýle-de, strategik pudaklarda işleýän daşary ýurtly hünärmenleriň bilim diplomlarynyň ykrar edilmegi boýunça hem ýörite ýönekeýleşdirilen tertip giriziler.

"Altyn wiza" ilkinji nobatda ýokary tehnologiýalar (IT), inženerçilik, önümçilik we häzirki zaman lukmançylygy ýaly ugurlarda zähmet çekýän hünärmenlere niýetlenendir. Şeýle hem, ýurduň infrastruktura taslamalaryna uly möçberli maýa goýumlaryny gönükdirýän telekeçiler üçin bu wiza durnukly hukuk esasyny berer. Bu çäreler arkaly Gazagystan sebitde iň özüne çekiji işewürlik we hünär merkezine öwrülmegi maksat edinýär.

Häzirki wagtda ýurtda hemişelik ýaşamak hukugyna eýe bolan 240 müňden gowrak daşary ýurt raýaty hasaba alyndy. Statisti wehimlere görä, olaryň ep-esli bölegini Russiýa Federasiýasynyň raýatlary emele getirýär. Daşary ýurtly myhmanlaryň agramly bölegi Astana we Almaty ýaly iri şäherleri, şeýle hem senagat taýdan ösen Karaganda, Kostanaý we Pawlodar welaýatlaryny iş we ýaşaýyş üçin amatly ýer hökmünde saýlap alýarlar.