Hytaýyň Lukmançylyk önümleri boýunça milli müdirligi "Neuracle Technology (Shanghai)" kompaniýasy tarapyndan işlenip düzülen, kelleçanagyň içine ýerleşdirilýän ilkinji inwaziw «beýni-kompýuter» interfeýsini söwda maksatly ulanmaga resmi rugsat berdi. "Bloomberg" agentliginiň habar bermegine görä, bu enjam häzirki zaman neýrotehnologiýalarynyň lukmançylyk bazaryna çykarylmagynda möhüm öwrülişik nokady boldy. Täze tehnologiýa beýni signallaryny gönüden-göni sanly ulgamlara geçirmäge mümkinçilik berýär.

Bu ýokary tehnologiýaly implant esasan oňurga ýiliginiň şikeslenmegi sebäpli bedeniň käbir agzalary bölekleýin ysmaz bolan uly ýaşly hassalar üçin niýetlenendir. Geçirilen kliniki synaglaryň netijeleri bu ulgamyň hassalaryň elinde dürli zatlary tutmak we saklamak ukybyny ep-esli gowulandyrmaga ýardam edýändigini görkezdi. Bu bolsa hereket ukybyny ýitiren adamlaryň gündelik durmuşda özbaşdaklygyny dikeltmekde uly ähmiýete eýedir.

Ulgam diňe bir inçejik implantdan ybarat bolman, eýsem ol beýni datçikleri, ýörite robotlaşdyrylan ellik, hirurgiýa gurallary we çylşyrymly algoritmler ýaly köp sanly bölekleri öz içine alýar. Beýniden gelýän signallar ýörite lukmançylyk programma üpjünçiligi tarapyndan çözülip, robotlaşdyrylan gurluşlara buýruk hökmünde iberilýär. Häzirki wagta çenli bu innowasion tehnologiýa 36 sany meýletinçi hassada üstünlikli synag edildi we oňyn netijeler alyndy.

Pekin tarapyndan täze neýrointerfeýsleriň «geljegiň pudaklarynyň» hataryna goşulmagy Hytaýyň bu ugurdaky bäsdeşlik ukybyny artdyrmaga gönükdirilendir. Hytaý startaplary häzirki wagtda Ilon Maskyň "Neuralink" kompaniýasy ýaly dünýä derejeli tehnologiýa ägirtleri bilen bäsleşmäge çalşyp, bu pudagy işjeň ösdürýärler. Şeýle ädimler diňe bir lukmançylygyň däl, eýsem ynsan we tehnologiýanyň arasyndaky täze gatnaşyklaryň hem binýadyny tutýar.