Merkezi Aziýa sebitiniň bank-maliýe ulgamynda sanly töleg mümkinçilikleri barha giňeldilýär. «Daryo» neşiriniň berýän maglumatlaryna görä, Gyrgyzystan we Täjigistan Respublikalarynda Apple Pay hyzmaty arkaly galtaşmasyz töleg geçirmek ulgamy resmi taýdan işe girizildi. Müşderiler öz bank kartlaryny Apple Wallet goşundysyna birikdirip, tölegleri göni akylly telefonlarynyň ýa-da sagatlarynyň kömegi bilen amala aşyryp bilýärler.

Gyrgyz bank ulgamynda bu döwrebap hyzmaty eýýäm birnäçe öňdebaryjy edaralar, ýagny Mbank, OptimaBank, Bakai, O!Bank we DemirBank hödürläp başlady. Täjigistanyň finans bazarynda bolsa täze mümkinçilikden «Alif», «Humo» hem-de «Aktiwbank» ýaly bank edaralarynyň müşderileri peýdalanyp bilýärler.

Bu sanly çemeleşme fiziki bank kartlaryny götermek zerurlygyny aradan galdyryp, söwda we hyzmatlar öýlerinde töleg işlerini ep-esli çaltlandyrýar. Täze tehnologiýanyň ornaşdyrylmagy sebitde nagtsyz hasaplaşyklaryň paýyny artdyrmaga we bank hyzmatlarynyň hilini ýokarlandyrmaga uly mümkinçilik berýär.

Şol bir wagtyň özünde, goňşy Özbegistan Respublikasy hem Apple Pay we Google Pay hyzmatlaryny ýurda getirmek boýunça degişli taýýarlyk işlerini alyp barýar. Ýurtda NFC tehnologiýasy arkaly töleg geçirmek üçin zerur bolan tehniki binýat doly taýýarlanylan hem bolsa, hyzmatlaryň resmi taýdan işläp başlajak anyk senesi häzir hasaplanmady.