Şu ýylyň 4 — 6-njy iýuny aralygynda Türkmenistanyň paýtagtynda «Turkmentextile Expo 2026» atly halkara sergisi guralar. Bu iri möçberli çäre dünýäniň dürli döwletlerinden öňdebaryjy enjam öndürijileri, innowasion kompaniýalary, dizaýnerleri we moda dünýäsiniň wekillerini bir meýdançada jemlär. Taslamanyň esasy maksady dokma pudagyndaky halkara hyzmatdaşlygy täze sepgitlere çykarmakdan we iň döwrebap tehnologik çözgütleri tanyşdyrmakdan ybaratdyr.

Gözden geçirişiň iň iri ugurlarynyň birini Ýewropanyň öňdebaryjy döwletleriniň biri bolan Italiýanyň milli pawilýony emele getirer. Ýurduň Daşary söwda agentligi bilen Dokma enjamlaryny öndürijileriň assosiasiýasynyň goldamagynda ondan gowrak iri italýan kärhanalary öz önümlerini we innowasiýalaryny paýtahta getirdiler. Sergi diňe bir taýýar önümleri däl, eýsem tebigy süýümleri gaýtadan işleýän kuwwatyny, himiki boýaglary, ätiýaçlyk şaýlaryny we önümçilik wezipelerini ýeňilleşdirýän täze tehnologiýalary hem öz içine alar.

Çäräniň işewürlik maksatnamasynda önümçiligi ekologiýa taýdan durnukly guramak we sanly ulgamlary önümçilige ornaşdyrmak ýaly derwaýys meseleler ara alnyp maslahatlaşylar. Şeýle-de, serginiň çäginde dünýä derejeli dizaýnerleriň we türkmen brendleriniň gatnaşmagynda uly moda görkezilişleri meýilleşdirilýär. Gözden geçirişe Fransiýadan, Marokkodan, Omandan, Russiýadan we goňşy Özbegistandan dizaýnerler, şeýle-de ýurdumyzyň öňdebaryjy moda öýleri gatnaşyp, özleriniň täze we milli öwüşginli lybaslaryny sarp edijilere hödürlärler.

Halkara çärä dünýä modasynyň iň meşhur markalarynyň we telekanallarynyň ýolbaşçylary hem hormatly myhmanlar hökmünde gatnaşarlar. Işewür duşuşyklar we tejribe alyşmalar dokma senagatynda täze hyzmatdaşlyk şertnamalaryny baglaşmaga we milli brendlerimiziň daşary ýurt bazarlaryndaky ornuny berkitmäge amatly şertleri döreder.