Şu ýylyň 7-nji aprelinde paýtagtymyzynyň «Ýyldyz» myhmanhanasynda Ýewropanyň Täzeleniş we ösüş banky (ÝTÖB) tarapyndan guralan «Eksport babatynda tejribe alyş-çalşygy» atly halkara maslahat öz işine başlady. Bu forum türkmen telekeçilerini, daşary söwda hünärmenlerini we iri eksportçylary bir ýere jemläp, ýerli önümleriň dünýä bazarlaryndaky ornuny berkitmäge gönükdirilen netijeli meýdança öwrüldi. Çäräniň esasy maksady ýurdumyzyň eksport kuwwatyny artdyrmakdan we telekeçilere täze mümkinçilikleri açmakdan ybaratdyr.

Maslahata gatnaşyjylaryň hatarynda «Nesil Coffee», «Erte», «Mahmal» ýaly öňdebaryjy hususy kärhanalaryň we daşary ýurt bazarlaryna gyzyklanma bildirýän beýleki öndürijileriň wekilleri bar. Maslahatyň ilkinji bölüminde ÝTÖB-iň bilermenleri Türkmenistandaky hususy pudagy goldamak üçin niýetlenen maliýe gurallary we söwdany ösdürmek maksatnamalary barada giňişleýin tanyşdyryşlary hödürlediler. Şeýle hem tejribeli eksportçylar bilen guralan çekişmelerde daşary söwdada duş gelýän amaly meseleler we olary çözmegiň yzygiderli ýollary ara alnyp maslahatlaşyldy.

Günüň ikinji ýarymynda geçirilýän ussatlyk sapaklary eksport amallarynyň iň döwrebap ugurlaryna, şol sanda marketing strategiýalaryna we elektron söwda platformalarynyň netijeli ulanylyşyna bagyşlandy. Hünärmenler önümleriň halkara derejesinde sertifikasiýalaşdyrylmagy we iş prosesleriniň awtomatlaşdyrylmagy boýunça gymmatly maslahatlaryny berdiler. Bu ugurlar ýerli harytlaryň daşary ýurtlarda bäsdeşlige ukyplylygyny üpjün etmekde we eksport amallaryny çaltlandyrmakda aýgytly ähmiýete eýedir.

Çykyş edýän bilermenleriň hatarynda ÝTÖB-iň hünärmenleri bilen bir hatarda «MST» agentliginiň, «Eksport Hyzmat», «SGS Turkmen Ltd.» kompaniýalarynyň we «Ak Sahypa» hojalyk jemgyýetiniň wekilleri bar. Şeýle ýokary derejeli maslahatyň geçirilmegi türkmen işewürleriniň halkara söwda kadalaryna uýgunlaşmagyna we daşary ýurtly hyzmatdaşlar bilen göni gatnaşyklary ýola goýmagyna ýardam edýär. Bu çäre ýurdumyzyň ykdysadyýetini diwersifikasiýa ýoly bilen ösdürmek strategiýasynyň möhüm bölegi bolup durýar.