Aşgabatda dünýä belli hindi akyldary, şahyry we Nobel baýragynyň eýesi Rabindranat Tagoryň doglan gününiň 165 ýyllygy mynasybetli dabaraly medeni çäre geçirildi. Hindistanyň Türkmenistandaky Ilçihanasy tarapyndan guralan bu ýatlama çäresi beýik şahyryň döredijiliginiň muşdaklaryny we jemgyýetçilik wekillerini bir ýere jemledi.

Dabara örän ähmiýetli pursat — «Magtymguly Pyragy» medeni-seýilgäh toplumynda oturdylan Tagoryň ýadygärligine gül goýmak dabarasy bilen başlandy. Beýik türkmen şahyrynyň adyny göterýän bu seýilgäh hindi edebiýatynyň genisini ýatlamak üçin iň amatly ýer bolup, ol ýerde hindi şahyrynyň heýkeliniň hem ýerleşmegi halklarymyzyň arasyndaky ruhy baglanyşygy we medeni gymmatlyklaryň ýakynlygyny has-da dabaralandyrdy.

Çäräniň resmi bölegini Hindistanyň Türkmenistandaky Adatdan daşary we Doly ygtyýarly Ilçisi jenap Bandaru Wilsonbabu açdy. Ol öz çykyşynda Tagoryň ynsanperwer ideýalarynyň ähmiýetini we halkara medeni gatnaşyklary berkitmekdäki ornuny aýratyn belledi. Şeýle hem ýazyjynyň ömri we döredijilik mirasy baradaky gürrüňlere talyplar we mugallymlar işjeň gatnaşdylar. Döwletmämmet Azady adyndaky Türkmen döwlet dünýä dilleri institutynyň talyplarynyň çykyşlary hemmeleriň ünsüni çekdi. Geljekki dilçiler hindi dilinde şahyryň goşgularyny ussatlyk bilen okap, Rabindranat Tagoryň ömür ýoly we pelsepewi garaýyşlary barada gyzykly maglumatlary paýlaşdylar.

Baýramçylyk çäresiniň medeni maksatnamasy milli öwüşginlere baý bolup, duşuşygyň täsirliligini has-da artdyrdy. Meşhur türkmen aýdymçysy Täçnabat Ýomudowa dabaranyň hakyky bezegine öwrüldi. Onuň ýerine ýetiren hindi aýdym-sazlary diňleýjilerde uly täsir galdyrdy we Aşgabat bilen Deliniň arasyndaky sazlaşykly medeni köpür boldy. Ol özüniň ussatlygy bilen myhmanlary hindi medeniýetiniň owazly dünýäsine atardy we bu gadymy halkyň sungatynyň çuňlugyny duýmaga mümkinçilik berdi. Bu çykyş türkmen ýerine ýetirijileriniň gündogar sazynyň iň inçe taraplaryny beýan etmäge bolan ukybyny ýene bir gezek subut etdi.

Sazly we edebi çykyşlardan başga-da, maksatnama sagdynlyk we sazlaşyk ýörelgesi bolan hindi däp-dessurlarynyň tanyşdyrylyşy hem girizildi. Ýoga toparynyň agzalary ýoganyň dürli tilsimlerini görkezip, bu sungatyň adam saglygy üçin ähmiýetini dabaralandyrdylar. Bu çykyş Tagoryň ýubileýine bagyşlanan umumy maksatnamanyň üstüni ýetirdi, sebäbi şahyryň özi hem ruhy we beden sazlaşygyny hemişe wasp edipdir.

Geçirilen bu medeni çäreTürkmenistan bilen Hindistanyň arasyndaky dostlukly gatnaşyklaryň ösmeginde möhüm ädim bolup, iki ýurduň medeni gymmatlyklaryna bolan belent sarpany ýene bir gezek görkezdi.