Häzirki zaman futbolynyň iň görnükli şahsyýetleriniň biri, Argentinanyň futbol toparynyň kapitany Lionel Messiniň hormatyna dünýäde iň uly we iň beýik heýkel toplumy gurlup başlandy. «MIR 24» habarlar agentliginiň berýän maglumatyna görä, bu täsin ýadygärligiň umumy boýy 26 metre barbar bolar. Taslama laýyklykda, äpet heýkel dünýä futbolynyň rowaçlygyna öwrülen Messiniň dünýä kubogyny ellerinde belent göterip, ýeňşi dabaralandyrýan taryhy pursadyny özünde jemleýär.

Heýkeliň göwresiniň aşa mähnet we agyr bolmagy sebäpli, ony gurnamak işleri aýratyn bölekler görnüşinde tapgyrlaýyn alnyp barylýar. Ýadygärligiň äpet böleklerini birleşdirmek we ýerine oturtmak üçin 70 tonna çenli ýük götermäge ukyply bolan ýörite agyr tehnika we kranlar ulanylýar. Konstruktsiýanyň ägirt uly ölçeglerine garamazdan, ussat heýkeltaraşlar futbolçynyň keşbiniň iň kiçi jikme-jikliklerine çenli gaty takyk işläp taýýarladylar. Bu çylşyrymly işde esasan hem hüjümçiniň ýüz keşbini we emosional ýagdaýyny durmuşy şekillendirmek has köp zähmeti talap etdi.

«Heýkeliň kelle bölegini ýasamak we Messiniň özüne meňzetmek gaty köp wagzymyzy aldy. Biz diňe şu bölegiň üstünde iki aýlap gije-gündiz işledik. Esasan hem meşhur futbolçynyň gözleriniň nury we agzynyň gurluşyny takyk şekillendirmek örän kyn boldy. Netijede, biz Messiniň Hindistanda oturdylan heýkelinden hem 5 metr beýik bolan täze bir dünýä rekordyny goýmagy başardyk» diýip, taslamanyň baş heýkeltaraşy Aldo Berois gürrüň berdi.

Ýadygärligiň gurluşygyny alyp barýan hünärmenler bu äpet medeni desganyň gurluşyk-gurnama işlerini gysga möhletde tamamlamagy maksat edinýärler. Taslamanyň guramaçylary täze heýkeliň dabaraly açylyş çäresini futbol boýunça dünýä çempionatynyň başlanjak güni bolan 11-nji iýuna çenli amala aşyrmagy meýilleşdirýärler. Bu mähnet taslama diňe bir sport janköýerleriniň däl, eýsem bütin dünýä syýahatçylarynyň iň köp gelýän gözel künjekleriniň birine öwrüler.