Hytaý Halk Respublikasynyň ýokary bilim ulgamynda giň gerimli we düpli özgertmeler amala aşyrylýar. Ýurduň Bilim ministrliginiň resmi maglumatlaryna laýyklykda, 2021 — 2025-nji ýyllar aralygynda ýurt boýunça jemi 12,2 müň sany bakalawr maksatnamasy ýatyryldy ýa-da wagtlaýynça duruzyldy. «South China Morning Post» neşiriniň habar bermegine görä, olaryň deregine häzirki zaman tehnologiýalarynyň we zähmet bazarynyň talaplaryna laýyk gelýän 10,2 müňe golaý täze hünär ugurlary açyldy.

Bu taryhy özgertmeler Hytaýyň uniwersitet maksatnamalarynyň 30 göteriminden gowragyna göni täsir etdi. Iň uly gysgaltmalar filologiýa, taryh ýaly ynsanperwer ylymlarynda, sungat, daşary ýurt dilleri we dolandyryş (menejment) ugurlarynda bellendi. Ekspertler emeli aňyň hem-de önümçiligi awtomatlaşdyrmak ulgamynyň çalt ösmegi sebäpli, bu hünärleriň uçurymlaryna bolan islegiň örän azalandygyny we bazarda bäsleşigiň aşa ýokarlanandygyny aýdyşarlar.

Geçirilýän reformalaryň esasy maksady ýokary bilimi ýurduň tehnologik we ykdysady ösüşine doly uýgunlaşdyrmakdan ybaratdyr. Häzirki wagtda Hytaýyň uniwersitetleri döwlet üçin iň zerur bolan ugurlara maýa goýýarlar. Mysal üçin, eýýäm dokuz sany ýokary okuw jaýynda emeli aňy önümçilik we inženerçilik ulgamlaryna göni ornaşdyrmaga ýardam edýän «janlandyrylan emeli aň» (embodied AI) ugry boýunça talyplar kabul edilip başlandy. Ýaşlaryň arasyndaky işsizlik derejesiniň 16 göterimden geçmegi hem häkimiýetleri okuw meýilnamalaryny durmuşyň hakyky isleglerine görä çalt üýtgetmäge mejbur etdi.