Türkiýäniň paýtagty Ankarada Türkmenistanyň Garaşsyzlygynyň 34 ýyllygyna bagyşlanan halkara ylmy-amaly maslahat geçirildi. Çäre Türkiýe Prezidentiniň kitaphanasynda ýerleşýän toplumda Türkmenistanyň Türkiýedäki Ilçihanasy tarapyndan gurnaldy.

Maslahatyň esasy mowzugy Türkmenistan bilen Türkiýäniň arasyndaky energetika we söwda-ykdysady hyzmatdaşlygyň geljegi boldy.

Maslahata Türkiýäniň döwlet edaralarynyň wekilleri, daşary ýurt diplomatlary, halkara guramalarynyň ýolbaşçylary, ylmy-barlag merkezleriniň hünärmenleri, žurnalistler, talyplar we türkmen diasporasynyň agzalary gatnaşdylar.

Çärä gatnaşyjylar Garaşsyzlyk ýyllarynda Türkmenistanyň gazanan üstünlikleri bilen tanyşdyryldy. Şeýle-de ýurt tarapyndan öňe sürlen halkara başlangyçlar we 2025-nji ýylyň dekabrynda Aşgabatda geçirilmegi meýilleşdirilýän halkara forum barada giňişleýin maglumat berildi. Bu forum Bitaraplygyň 30 ýyllygyna we Halkara parahatçylyk we ynam ýylyna bagyşlanar.

Çykyş edenler, Türkmenistanda alnyp barylýan özgertmeleri, ykdysady ösüşiň depginini we ýurduň halkara hyzmatdaşlyk ugrunda açyk syýasatyny nygtadylar. Şeýle-de türkmen we türk halklarynyň taryhy kökleriniň häzirki hyzmatdaşlygyň berk binýadydygy aýratyn bellenildi.

Maslahatyň çäklerinde fotosergi we Türkmenistanyň ösüş ýoluny görkezýän wideofilmler görkezildi. Çäre türkmen milli tagamlarynyň dadylmagy bilen tamamlandy.