Balkan we Ahal sebitleriniň medeni durmuşynda öçmejek yz galdyran Türkmenistanyň at gazanan artisti Nabat Nurmuhammedowanyň doglan gününiň 100 ýyllyk şanly senesi mynasybetli Ahal welaýatynyň Kaka etrabynyň medeniýet öýünde dabaraly aýdym-sazly agşam geçirildi. Milli sungatymyzyň taryhynda uly orun tutan ussadyň hatyrasyna guralan bu medeni çäre barada ýurdumyzyň esasy metbugat edaralary habar berýärler.

«Ýüreklere ýol salan bagşy» diýlip atlandyrylan bu dabaranyň barşynda çykyş eden medeniýet we sungat işgärleri Sahy bagşy ýaly görnükli ussadyň ýoly bilen giden bagşynyň manyly ömri we döredijilik dünýäsi barada durup geçdiler. Ýygnananlar aýdymçynyň türkmen aýdym-saz sungatynyň altyn gaznasyny baýlaşdyrmakda bitiren hyzmatlaryna we onuň ýetişdiren şägirtleriniň alyp barýan işlerine ýokary baha berdiler.

Dabarada bellenilişi ýaly, halypanyň seýrek duş gelýän zehini irki ýaşlarda ýüze çykyp, ol 16 ýaşynda eýýäm Döwlet filarmoniýasynyň düzümine kabul edilýär we hünär ussatlygyny kämilleşdirip başlaýar. Şeýle hem bagşynyň 1941 — 1945-nji ýyllaryň harby synaglary döwründe aýdym-saz topary bilenfront liniýalarynda we harby bölümlerde çykyş edip, esgerleriň ruhuny götermekde görkezen gahrymançylygy aýratyn bellenip geçildi.

Medeni çäräniň aýdym-sazly bölüminde halypanyň ýoluny dowam edýän zehinli aýdymçylar, şol sanda onuň şägirdi, Türkmenistanyň halk artisti Şemşat Hojaýewa çykyş etdi. Konsertiň dowamynda ussadyň repertuaryndan orun alan «Galmanam», «Tüni derýa», «Zülpüň seniň», «Çykdym güller» ýaly meşhur halk aýdymlary täze öwüşginde ýerine ýetirilip, tomaşaçylarda uly täsir galdyrdy.