Türkmenistanyň işjeň ýaşlar wekiliýeti Merkezi Aziýa ýurtlarynyň wekilleri bilen bilelikde 2026-njy ýylyň 24-nji martyndan 2-nji apreline çenli Hindistan Respublikasynda dowam edýän tanyşdyryş maksatnamasyna gatnaşýar. Bu sapar ýaşlar diplomatiýasynyň çäginde guralyp, gatnaşyjylara Hindistanyň iň iri şäherleri bolan Mumbaýyň, Goanyň we Nýu-Deliniň ylmy, tehnologik we medeni ösüşleri bilen ýakyndan tanyşmaga mümkinçilik berýär. Saparyň esasy maksady tehnologiýa, ylym we telekeçilik ulgamlarynda özara tejribe alyşmakdan ybaratdyr.

Mumbaý şäherindäki maksatnamanyň dowamynda ýaşlar dünýäniň iň meşhur inženerçilik ýokary okuw mekdepleriniň biri bolan Hindistanyň Tehnologiýa institutyna (IIT Bombay) baryp gördüler. Şeýle hem olar Bombeý gazna biržasynyň iş ýörelgeleri bilen tanyşyp, sebitiň ykdysady kuwwatyna baha berdiler. Medeni bölekde bolsa Elefant gowaklary we dünýä belli «Bolliwud» kinosynyň merkezi bolan Dadasaheb Phalke kinostudiýasy ýaly taryhy hem-de döwrebap desgalara gezelenç edildi. Maharaştra ştatynyň gubernatory bilen geçirilen duşuşyk bolsa syýasy taýdan möhüm ähmiýete eýe boldy.

Häzirki wagtda, ýagny 28-nji martda türkmen wekiliýeti Goa ştatynda öz saparyny dowam etdirýär. Bu ýerde ýaşlar XVII asyra degişli bolan meşhur portugal galasy Aguada fortuna we ÝUNESKO-nyň mirasyna girýän gadymy ybadathanalar bilen tanyşýarlar. Öňümizdäki günlerde Milli okeanografiýa institutynda Hindistanyň «mawy ykdysadyýet» we deňiz barlaglary ugrundaky täzeçil taslamalaryna syn ederler. Goanyň tebigy gözellikleri we taryhy ýadygärlikleri ýaşlarda Hindistanyň köpöwüşgünli medeniýeti barada uly täsir galdyrýar.

Saparyň jemleýji bölegi Hindistanyň paýtagty Nýu-Delide jemlener. Ol ýerde ýurduň ýaşlar işleri we sport ministri hem-de daşary işler ministri bilen duşuşyklar meýilleşdirilýär. Şeýle hem «Mera Yuva Bharat» ýaşlar maksatnamasynyň gatnaşyjylary bilen pikir alyşmalar guralyp, geljekde iki ýurduň ýaşlarynyň arasynda täze hyzmatdaşlyk platformalaryny döretmek meseleleri ara alnyp maslahatlaşylar. Bu ynsanperwerlik sapary Türkmenistan bilen Hindistanyň arasyndaky dostlukly gatnaşyklaryň geljekki eýeleri bolan ýaşlaryň dostlugyny has-da berkider.