2026-njy ýylyň 24–27-nji marty aralygynda Bütindünýä Saglygy Goraýyş Guramasynyň (BSGG) Ýewropa regional býurosynyň Immunizasiýa we sanjym arkaly dolandyrylýan ýokanç keseller maksatnamasynyň tehniki hünärmeni doktor Oleg Beneş Türkmenistanda iş saparynda boldy. Bu saparyň esasy maksady sanjymlaryň howpsuzlyk ulgamlaryny kämilleşdirmek boýunça milli tagallalary goldamakdan we bu ugurda halkara ülňülerini ornaşdyrmakdan ybarat boldy.

Saparyň ilkinji günlerinde BSGG-niň bilermeni Türkmenistanyň Saglygy goraýyş we derman senagaty ministrliginiň Döwlet sanitar-epidemiologiýa gullugynyň hünärmenleri bilen ýakyndan hyzmatdaşlyk etdi. Duşuşyklaryň çäginde immunizasiýadan soňky ýüze çykyp biljek islenilmeýän ýagdaýlara (NPPY) gözegçilik etmegiň milli ulgamy seljerildi. Şeýle-de, BSGG-niň NPPY gözegçiligini güýçlendirmek boýunça gollanmalaryny ulanmak we monitoring işlerini mundan beýläk-de kämilleşdirmek üçin toplumlaýyn iş meýilnamasy işlenip düzüldi.

Şeýle hem, farmakogözegçilik we BSGG-niň Derman serişdeleriniň halkara monitoringi maksatnamasy (PIDM) boýunça onlaýn okuw maslahaty geçirildi. BSGG-niň ştab-kwartirasynyň hünärmeni doktor Aýako Fukuşimanyň gatnaşmagynda "akylly" farmakogözegçilik boýunça global strategiýa tanyşdyryldy. Bu okuwda ýurtlaryň dermanlaryň we sanjymlaryň howpsuzlygy baradaky maglumatlary özara alyşmaga mümkinçilik berýän global ulgama agza bolmagynyň artykmaçlyklary barada giňişleýin durlup geçildi.

Saparyň jemleýji günlerinde doktor Beneş Milli immunizasiýa maksatnamasynyň hünärmenleri üçin ýörite okuw maslahatlaryny geçirdi. 27-nji martda bolsa, Türkmenistanyň BSGG-niň Derman serişdeleriniň we sanjymlaryň halkara monitoringi boýunça global maksatnamasyna assosirlenen agza hökmünde goşulmagy baradaky meseleler ara alnyp maslahatlaşyldy. Bu hyzmatdaşlyk ýurtda ilatyň sanjymlara bolan ynamyny ýokarlandyrmaga we milli saglygy goraýyş howpsuzlygyny has-da berkitmäge hyzmat eder.