Günbatar Türkmenistanyň bugdaý meýdanlarynda şu günlerde ak ekinlere ideg etmek işleri ýokary depginde dowam edýär. «Altyn asyr» elektron gazetiniň habar bermegine görä, Balkan welaýatynyň gallaçy daýhanlary 2026-njy ýylyň hasyl ýygymy möwsüminde 50 müň gektar ýerden jemi 80 müň tonnadan gowrak däne ýygnap almagy meýilleşdirýärler. Geçen güýzde ekilen we wagtynda oňat gögeriş alnan ekinleriň ýagdaýy häzirki wagtda geljekki bol hasylyň düýbüni tutýar.

Ekin meýdanlarynda ösüş suwuny tutmak, mineral we organiki dökünler bilen iýmitlendirmek hem-de haşal otlara garşy göreşmek çäreleri yzygiderli alnap barylýar. Bu möwsümleýin işlerde döwrebap tehnikalaryň we tirkeg gurallarynyň güýjünden netijeli peýdalanylýar. Aýratyn hem, önümçilige ornaşdyrylan sanly ulgamlar we telematik usullar işleriň takyklygyny hem-de hilini ýokarlandyrmaga ýardam edýär.

Welaýatyň Gyzylarbat, Bereket, Magtymguly, Etrek we Esenguly etraplarynda bugdaýa ideg etmek işleri has-da guramaçylykly ýola goýuldy. Ekin dolanyşygyndaky ýerleriň arassaçylygy we gerbosidleriň kadaly ulanylmagy hünärmenleriň hemişelik gözegçiliginde saklanýar. «Balkanobahyzmat» önümçilik birleşiginiň etrap bölümleriniň hünärmenleri daýhanlara tehniki hyzmatlary bökdençsiz amala aşyrmakda kömek berýärler.

Balkanly gallaçylaryň öňünde duran esasy wezipe — agrotehnikanyň kadalaryny gyşyksyz berjaý etmek arkaly bellenilen sepgitlere ýetmekdir. Häzirki wagtda amala aşyrylýan yzygiderli ideg işleri sebitiň azyk howpsuzlygyny berkitmäge we ýurduň umumy harmanyna mynasyp goşant goşmaga gönükdirilendir.