Şu ýylyň ilkinji dört aýynyň jemleri boýunça ýurduň günbatar sebitiniň ykdysady görkezijileri durnukly ösüşi tassyklady. Hasabat döwründe welaýat boýunça senagat önümçiliginiň umumy möçberi geçen ýylyň degişli döwri bilen deňeşdirilende 6,6 göterim artdy. Nebit çykarmak, ony gaýtadan işlemek we elektrik energiýasyny öndürmek ýaly strategik ugurlarda oňyn netijeler gazanyldy, bu bolsa sebitiň energetika kuwwatynyň yzygiderli artýandygyna şaýatlyk edýär.

Himiýa we dokma senagatynda hem düýpli ösüşler bellenildi. Hususan-da, mineral dökünleriň öndürilişi 2,1 esse, nah ýüplükleriň möçberi bolsa 11 göterim ýokarlandy. Ýod önümçiliginde gazanylan 6,5 göterimlik ösüş sebitiň tebigy serişdelerini gaýtadan işlemegiň netijeliligini görkezýär. Bu görkezijiler welaýatyň senagat düzüminiň diwersifikasiýa ýoly bilen ösdürilýändigini we eksport mümkinçilikleriniň giňeýändigini tassyklaýar.

Azyk harytlarynyň önümçiliginde gazanylan netijeler ilatyň isleglerini doly kanagatlandyrmaga gönükdirilendir. Hasabat döwründe unuň öndürilişi 52,5 göterim, gök önümleriň möçberi 1,5 esse, ýumurtga önümçiligi bolsa 25,8 göterim artdy. Şeýle hem süýt, süýji-köke we balyk önümleriniň öndürilişinde durnukly ýokary görkezijiler hasaba alyndy. Bu bolsa sebitde azyk howpsuzlygyny üpjün etmek we ýerli önümçiligi goldamak boýunça alnyp barylýan işleriň netijesidir.

Sebitiň maliýe-ykdysady ýagdaýy durnuklylygyny saklaýar we ýerli býujetiň girdeji meýilnamasy 101 göterim berjaý edildi. Bank şahamçalarynyň girdeji meýilnamasynyň 136,6 göterim ýerine ýetirilmegi welaýatyň işewürlik işjeňliginiň ýokarydygyny görkezýär. Oba milli maksatnamasynyň çäklerinde gurluşyk işleriniň depginli dowam etdirilmegi we maýa goýumlaryň netijeli özleşdirilmegi sebitiň durmuş-ykdysady taýdan has-da kämilleşmegine giň ýol açýar.