Visa kompaniýasy öz töleg ulgamyny ChatGPT platformasyna birleşdirdi. Bu täzelik emeli aň kömekçisine ulanyjylaryň öňünde goýan şertlerine görä harytlary saýlamaga we söwda amallaryny özbaşdak amala aşyrmaga şert döredýär.

Taslamanyň çäginde OpenAI karar kabul etmek we özara täsir tehnologiýalaryna jogap berse, Visa tölegleri tassyklamak hem-de howpsuzlygy üpjün etmek wezipesini ýerine ýetirer. Emeli aň agentleri Visa kartlaryny kabul edýän ähli söwda nokatlarynda amallary ýerine ýetirip bilerler. Hyzmatdan peýdalanmak üçin ulanyjylar öz kartlaryny ChatGPT ulgamyna birleşdirmelidirler. Howpsuzlyk maksady bilen çykdajy çäklendirmeleri, amallary tassyklamak ulgamy we ynamdar satyjylaryň sanawy göz öňünde tutuldy.

Visa kompaniýasynyň önümler we strategiýa boýunça direktory Jek Forestelliň bellemegine görä, ilkinji döwürde amallaryň köpüsi ulanyjynyň tassyklamagy arkaly geçiriler. Sebäbi sarp edijileriň emeli aňa maliýe amallaryny doly ynanmagy üçin wagt gerek bolar. Taraplar ylalaşygyň maliýe şertlerini mälim etmediler.