ÝUNISEF we Türkmenistanyň Hökümeti ýurtda çagalaryň bähbidi üçin maýa goýumlaryny has netijeli meýilleşdirmek, monitoring etmek we olaryň hilini ýokarlandyrmak maksady bilen döwlet maliýeleşdiriş maglumatlarynyň ulanylyşyny berkitmäge gönükdirilen geňeşmeleriň tapgyryny gurady. Çäreler halkara guramanyň Ählumumy öňdebaryjy tejribe merkeziniň durmuş ulgamyny maliýeleşdirmek boýunça geňeşçisi Ulugbek Olimowyň Aşgabada amala aşyran ýörite iş saparynyň çäklerinde amala aşyryldy.

Saparyň çäklerinde Türkmenistanyň Maliýe we ykdysadyýet, Zähmet we ilaty durmuş taýdan goramak, Bilim, Saglygy goraýyş we derman senagaty ministrlikleriniň ýolbaşçylary hem-de pudaklaýyn tehniki hünärmenleri bilen duşuşyklar geçirildi. Şeýle hem durmuş ulgamynyň ministrlikleriniň wekilleriniň gatnaşmagynda anyk meseleleri amaly taýdan seljermek maksady bilen iki günlük tehniki seminar guraldy.

Maslahatlaşmalaryň dowamynda çagalaryň abadançylygyny üpjün edýän esasy ugurlara, ýagny irki ösüşe, mekdebe çenli bilime, durmuş goraglylygyna we ilkinji saglygy goraýyş-sanitar kömegine bölünýän maýa goýumlaryna has çuňňur düşünmek üçin bar bolan býujet klassifikasiýalarynyň, hasabatlylyk ulgamlarynyň hem-de döwlet çykdajylary baradaky maglumatlaryň nähili ulanylyp bilinjekdigi baradaky meseleler gözden geçirildi.

Taraplar durmuş çykdajylaryny seljermek we pudagara hyzmatdaşlygy berkitmegiň ýollary üçin mümkin bolan synag ugurlaryny ara alyp maslahatlaşdylar. Bilim ulgamynda mekdebe çenli bilim we mekdebe taýýarlyk maksatnamalary bilen baglanyşykly çykdajylar, saglygy goraýyşda bolsa ilkinji emleri has netijeli ulanmak boýunça çäreler göz öňünde tutuldy. Şeýle-de Maliýe we ykdysadyýet ministrligi bilen bilelikde býujet tejribesini we çagalaryň bähbidine döwlet maýa goýumlarynyň yzarlanylyşyny kämilleşdirmek mümkinçilikleri tassyklanyldy.