Moskwada her ýyl geçirilýän «Ak hasa» haýyr-sahawat festiwaly geçirildi. Bu çäre Görmeýänleriň halkara ak hasa gününe bagyşlanyp, deň hukuklylyk, özbaşdaklyk we adam mertebesi ýaly gymmatlyklary wagyz edýär. Festiwal dürli ýurtlardan gelen sungat işgärlerini we zehinli çagalary bir ýere jemledi.

Bu ýyl hem Türkmenistan festiwalda işjeň gatnaşyp, «Yenme» jemgyýetçilik guramasy arkaly öz medeni we ynsanperwer başlangyçlaryny dünýä tanatdy. Türkmenistan halkara medeni gatnaşyklary ösdürmekde yzygiderli ädimler ädýär.

Agşamyň iň täsirli pursatlarynyň biri türkmenistanly ýaş aýdymçy Şirin Jumaýewanyň çykyşydy. Ol meşhur rus aýdymçysy Mark Tişman bilen bilelikde «Ýalkyra» atly aýdymy ýerine ýetirdi. Bu duet tomaşaçylaryň ýüregine ýol tapyp, uly el çarpyşmalar bilen garşylandy.

Türkmenistandan gelen ýaş gatnaşyjylar üçin Larisa Dolina, Waleria, Aleksandr Buýnow, Rodion Gazmanow, Denis Klýawer ýaly tanymal artistler bilen bir sahnada çykyş etmek uly tejribe boldy we olaryň zehininiň ykrar edilendigini görkezdi.

Bu medeni çäre sungatyň adamlary we ýurtlary birleşdirip bilýändigini subut etdi. Türkmenistanyñ gatnaşmagy inklýuziýanyň, çagalary goldamagyň we sungatyň jemgyýetdäki ornunyň nähili möhümdigini ýene bir gezek görkezdi.