Prezident Serdar Berdimuhamedowyň Ýaponiýa amala aşyran iş saparynyň dowamynda öňdebaryjy ýapon kompaniýalarynyň ýolbaşçylary bilen geçirilen işewürlik duşuşygy Türkmenistan bilen Ýaponiýanyň arasyndaky ykdysady hyzmatdaşlygyň ýokary derejesini görkezdi.

Türkmenistanyň Prezidenti çykyşynda ýapon kompaniýalarynyň köp ýyllaryň dowamynda özüni ygtybarly hyzmatdaş hökmünde tanadandygyny belledi. Nygtalyşy ýaly, Türkmenistan bilen Ýaponiýanyň arasynda emele gelen gatnaşyklaryň binýady özara ynam, netijelilik we uzak möhletleýin maksatlara gönükdirilen hyzmatdaşlykdyr. Şol bir wagtda Türkmenistan bu hyzmatdaşlygy has giň möçberde ösdürmegi maksat edinýär.

Türkmenistan üçin Ýaponiýa ýokary tehnologiýalaryň, innowasion ykdysady ösüşiň we senagat bilen ekologiýanyň sazlaşykly utgaşdyrylmagynyň nusgasy bolup durýar. Ýapon kompaniýalarynyň ylym, önümçilik, dolandyryş we korporatiw menejment ulgamynda gazanan üstünlikleri Türkmenistanyň milli ykdysadyýetini döwrebaplaşdyrmakda möhüm tejribe hökmünde kabul edilýär.

Serdar Berdimuhamedow ITOCHU, Kawasaki, Mitsubishi, Sojitz, Toyo, Mitsui, Sumitomo, Komatsu, Toyota ýaly iri ýapon kompaniýalarynyň Türkmenistanda alyp barýan işlerine ýokary baha berdi. Soňky ýyllarda olaryň gatnaşmagynda Türkmenistanda iri senagat desgalary ulanyşa berildi. Maryda we Garabogazda gurlan ammiak we karbamid önümçilik toplumlary, Gyýanlydaky polimer zawody, Owadandepedäki gazdan benzin öndürýän desga, Çärjew etrabyndaky gazturbinaly elektrik stansiýasy munuň aýdyň mysalydyr.

Döwlet Baştutany bilelikde gazanylan netijeleriň geljege ynam bilen garamaga mümkinçilik berýändigini belläp, Türkmenistanyň ýapon işewür toparlaryna uzak möhletleýin maýa goýumlar üçin amatly şertleri döretmäge taýýardygyny tassyklady. Energetika, şol sanda gaýtadan dikeldilýän energiýa çeşmeleri, ulag-logistika ulgamlary, ýokary tehnologiýaly we ekologiýa ugurly önümçilikler, suw serişdelerini dolandyrmak, infrastruktura döwrebaplaşdyrmak, hünärmenleri taýýarlamak ileri tutulýan ugurlar hökmünde görkezildi. Şeýle-de Türkmenistan ýapon tehnologiýalaryny we önümlerini türkmen bazarynda giňden ilerletmäge taýýardyr.