Türkmenistanyň Söwda-senagat edarasynda Ýaponiýanyň ýurdumyzdaky Ilçihanasynyň geňeşçisi Idzisu Satoşi bilen resmi duşuşyk geçirildi. Maslahatyň baş maksady 2027-nji ýylyň 19-njy marty — 26-njy sentýabry aralygynda Ýaponiýanyň Ýokogama şäherinde guraljak “GREEN EXPO 2027” halkara bagbançylyk sergisine Türkmenistanyň gatnaşmagy baradaky meseleleri ara alyp maslahatlaşmakdan ybarat boldy. Taraplar Türkmenistanyň Prezidentiniň Ministrler Kabinetiniň mejlisinde milli pawilýonyň guramaçylyk derejesini ýokary üpjün etmek boýunça beren tabşyryklaryny durmuşa geçirmegiň ugurlaryny seljerdiler.

«Bagt üçin geljegiň peýzažy» şygary astynda geçiriljek bu dünýä ähmiýetli sergä dünýäniň 80-e golaý döwletiniň gatnaşmagyna garaşylýar. Ýaponiýaly diplomatyň nygtamagyna görä, Türkmenistanyň bu forumdaky çykyşy halkara jemgyýetçilikde uly gyzyklanma döreder. Ýurduň çöl we gurak howa şertlerinde emele getiren ýaşyl oazisleri hem-de giň gerimli ekologiýa maksatnamalary dünýä bagbançylyk sungaty we landşaft dizaýny üçin täsin, şeýle hem öwrenilmäge mynasyp tejribedir.

“GREEN EXPO 2027” sergisindäki Türkmenistanyň Milli pawilýony ýurduň ekologik diplomatiýasyny we durnukly ösüş ulgamyndaky maýa goýum mümkinçiliklerini Ýaponiýanyň hem-de dünýäniň öňdebaryjy işewürler toparlaryna tanyşdyrmak üçin möhüm institusional meýdança öwrüler. Pawilýonda suw serişdelerini netijeli ulanmak, ekologiýa howpsuzlygyny üpjün etmek we gurluşykda "ýaşyl" tehnologiýalary ornaşdyrmak boýunça gazanylan üstünlikler görkeziler.