Türkmenistanyň Prezidenti Serdar Berdimuhamedow Ministrler Kabinetiniň hem-de Döwlet howpsuzlyk geňeşiniň bilelikdäki mejlisini geçirdi. Onuň barşynda döwlet Baştutanymyz asylly däbe görä, jenaýat edendikleri üçin iş kesilen we eden etmişlerine ökünip, ak ýürekden toba gelen raýatlaryň günäsiniň geçilýändigini belledi. Şunuň bilen baglylykda, Döwlet howpsuzlyk geňeşiniň sekretary, Türkmenistanyň Prezidentiniň ýanyndaky Raýatlyk we günä geçmek meseleleri boýunça teklipleri taýýarlamak baradaky toparyň başlygy B.Gündogdyýew mukaddes Garaşsyzlygyň 35 ýyllygy mynasybetli geçirilen degişli işler barada hasabat berdi.

Prezident Serdar Berdimuhamedow hasabaty diňläp, gumanizm we rehimdarlyk ýörelgelerine eýermek bilen, iş kesilen 1054 raýatyň ýurduň Garaşsyzlygynyň 35 ýyllygy mynasybetli günäsini geçmek hakyndaky Permana gol çekdi. Resminama laýyklykda, günäsi geçilen raýatlar mundan beýläk-de azatlykdan mahrum etmek görnüşindäki esasy jeza çäresini, şeýle hem belli bir ýerde ýaşamak borjuny ýüklemek görnüşindäki goşmaça jeza çäresini çekmekden doly boşadyldy.

Döwlet Baştutanymyz toparyň başlygyna hukuk goraýjy edaralaryň ýolbaşçylary bilen bilelikde günäsi geçilen adamlaryň ählisini tussaglykdan boşadyp, olaryň ýakyn wagtda öz öýlerine, maşgala agzalarynyň arasyna baramaklary üçin zerur çäreleri görmegi tabşyrdy. Prezident Serdar Berdimuhamedow günäsi geçilen raýatlara yhlasly zähmet çekip, Watana ak ýürekden hyzmat etmeklerini we halal zähmetiň hözirini görüp ýaşamaklaryny arzuw etdi.