Şu ýylyň 29-njy iýuny we 1-nji iýuly aralygynda Türkmenistanyň Söwda-senagat edarasynyň başlygy Mergen Gurdowyň ýolbaşçylygyndaky milli wekiliýet Ýaponiýa döwletinde resmi iş saparynda boldy. Ýurdumyzyň Daşary işler ministrliginiň maglumatyna görä, bu sapar halkara derejesindäki iri çärelere gatnaşmak we guramaçylyk işlerini utgaşdyrmak maksady bilen amala aşyryldy.

Gündogar Aziýa döwletine guralan saparyň esasy wezipesi 2027-nji ýylyň 19-njy martyndan 26-njy sentýabryna çenli Ýokohama şäherinde geçirilmegi meýilleşdirilen «GREEN EXPO 2027» atly bütindünýä bagbançylyk sergisine taýýarlyk görýän gatnaşyjylaryň halkara maslahatyna goşulmakdan ybarat boldy. Bu meýdança bütindünýä sergisiniň esasy ugurlaryny kesgitlemek üçin hyzmat edýär.

Halkara duşuşyklaryň çäklerinde türkmen wekilleri milli pawilýonyň gurluşygyny we dolandyrylyşyny meýilleşdirmek, logistika amallaryny düzmek hem-de serginiň dowamynda Türkmenistanyň Milli gününi guramak boýunça giňişleýin iş alyp bardylar. Wekiliýet agzalary umumy we ýöriteleşdirilen sessiýalara, ikitaraplaýyn maslahatlaşmalara, şeýle-de tanyşdyryş maksatly gezelençlere işjeň gatnaşdylar.

Iş saparynyň gün tertibine laýyklykda, Türkmenistanyň Söwda-senagat edarasynyň ýolbaşçysy Ýaponiýanyň Daşary söwda guramasynyň (JETRO) ýerine ýetiriji wise-prezidenti T.Suzuki bilen ýörite gepleşikleri geçirdi. Mundan başga-da, «GREEN EXPO 2027» halkara assosiasiýasynyň Baş sekretarynyň orunbasary K.Haçiýama bilen hem netijeli duşuşyk guraldy.

Gepleşikleriň dowamynda taraplar iki ýurduň arasyndaky ykdysady we işewürlik hyzmatdaşlygyny has-da giňeltmegiň geljegini ara alyp maslahatlaşdylar. Hususan-da, bütindünýä sergisi bilen bir hatarda, 2027-nji ýylda Tokio şäherinde kiçi we orta telekeçiligiň wekilleriniň gatnaşmagynda türkmen-ýapon işewürler forumyny guramak baradaky başlangyçlar jikme-jik gözden geçirildi.