Oýun sanawy
Geçen hepdede Türkmenistanyň Döwlet haryt-çig mal biržasynda geçirilen söwdalaryň netijeleri boýunça jemi 18 sany geleşik hasaba alyndy. Daşary ýurtly maýadarlar bilen baglaşylan ylalaşyklaryň umumy bahasy 28 million 74 müň ABŞ dollaryndan gowrak boldy. Bu netijeler ýurduň önümçilik kuwwatynyň halkara bazaryndaky bäsdeşlige ukyplylygyny nobatdaky gezek tassyklady.
Türkiýäniň we Özbegistanyň işewürleri tarapyndan ýerli himiýa we nebit önümlerine uly isleg bildirildi. Söwdalaryň dowamynda «Türkmenhimiýa» döwlet konserniniň kärhanalarynda öndürilen tehniki kükürt kislotasy we «Türkmennebit» döwlet konserniniň binýatlyk ýagy satyn alyndy. Bu önümler sebitiň senagat kärhanalary üçin zerur bolan möhüm çig mal serişdeleri hökmünde uly ähmiýete eýedir.
Eksport amallarynyň çäklerinde dokma we azyk önümleriniň hem uly tapgyrlary ýerlenildi. BAE-niň, Hindistanyň, Gyrgyzystanyň we beýleki ýurtlaryň telekeçileri nah matalary, taýýar geýimleri, buýan köküniň ekstraktyny we bugdaý ununy satyn aldylar. Eksport harytlarynyň görnüşleriniň köp dürliligi Türkmenistanyň daşary söwda dolanyşygynyň durnukly ösmegine ýardam berýär.
Şeýle hem ýurdumyzyň telekeçileri içerki bazar üçin zerur bolan çig mallary satyn almakda işjeňlik görkezdiler. Ýerli işewürler tarapyndan baglaşylan geleşikleriň bahasy 20 million 955 müň manatdan geçdi. Esasan hem pagta süýümi we ýüpek çig maly ýaly önümler satyn alnyp, olar ýerli önümçiligiň binýadyny pugtalandyrmaga gönükdiriler.
Şeýle hem okanyň
«Arsenalyň» wingeri Bukaýo Saka ynsanperwerlik işleri üçin abraýly Sokrates baýragyna mynasyp boldy
Bugün 05:10Londonyň «Arsenal» klubunyň we Angliýanyň milli ýygyndysynyň wingeri Bukaýo Saka köp sanly ýurtlarda mätäç adamlara we çagalara beren ynsanperwerlik kömegi üçin abraýly Sokrates baýragy bilen sylaglandy. Bu halkara sylag futbolçy 26-njy oktýabrda Londonda geçirilen «Altyn top» gowşurylyş dabarasynda dabaraly ýagdaýda gowşuryldy. Saka kyn ýagdaýa düşen maşgalalara hem-de çagalara lukmançylyk kömegini berýän «Big Shoe» haýyr-sahawat guramasy bilen bütin dünýä boýunça ýakyn hyzmatdaşlyk amala aşyrýar.
Bilelikdäki haýyr-sahawat taslamalarynyň çäklerinde iňlis futbolçysy Nigeriýada we beýleki Afrika ýurtlarynda çagalar üçin gaýragoýulmasyz hirurgiki operasiýalary maliýeleşdirmäge giňden goldaw berdi. «France Football» neşiriniň maglumatlaryna görä, bu ynsanperwer amallaryň netijesinde 100-den gowrak çaga saglygyny dikeltmek üçin zerur bolan lukmançylyk kömegini aldy. Mundan başga-da, Saka Türkiýede we Marokkoda bolup geçen weýrançylykly ýertitremelerden ejir çeken maşgalalar üçin wagtlaýyn ýaşaýyş jaýlarynyň gurluşygyna uly möçberde serişde gönükdirdi.
Sokrates baýragy 2022-nji ýylda «France Football» žurnaly tarapyndan «Peace and Sport» guramasy hem-de meşhur braziliýaly futbolçy Sokratesiň maşgalasy bilen bilelikde döredildi. Bu baýrak futbol wekillerine meýdançadan daşary amala aşyran jemgyýetçilik we ynsanperwerlik taslamalary üçin gowşurulýar. Baýragyň taryhdaky ilkinji eýesi senegally hüjümçi Sadio Mane bolupdy, Sakanyň bu ýeňşi bolsa sportuň jemgyýetçilik jogapkärçiligini ýene bir gezek dünýä aýan etdi.
Blitz