Türkmenistanyň futbol boýunça milli ýygyndysy 31-nji martda Bangkokda geçiriljek aýgytlaýjy duşuşykda diňe ýeňiş gazanmagy maksat edinýär. Bu barada Bangkogyň «Rajamangala» stadionynda boljak oýnuň öňüsyrasynda geçirilen metbugat maslahatynda toparyň baş tälimçisi Rowşan Meredow we tejribeli ýarym goragçy Elman Tagaýew mälim etdiler. Milli ýygyndymyz bu taryhy pursat üçin ähli güýjüni gaýgyrman taýýarlandy.

Baş tälimçi Rowşan Meredow 31-nji martda boljak duşuşygyň "aýgytlaýjy" häsiýetini aýratyn nygtady. "Biz bu ýaryşa taýýarlyk görmek üçin Watanymyzda örän netijeli okuw-türgenleşik ýygnanyşyklaryny geçirdik" diýip, tälimçi belledi. Şeýle hem, ol Tailandyň ýygyndysynyň güýçli garşydaşdygyny, olaryň mundan öň hem Aziýa Kubogynyň final tapgyrynda oýnandygyny aýdyp, garşydaşyň tejribesine ýokary baha berdi we myhmanparazlyk üçin tailand tarapyna minnetdarlyk bildirdi.

Milli ýygyndymyzyň esasy oýunçylarynyň biri Elman Tagaýew hem toparyň ruhybelentdigini tassyklady. "Taýýarlygymyz ýokary derejede geçdi we biz ertirki oýna doly taýýar. Aşgabatda 3:1 hasabynda ýeňen hem bolsak, biz köne netijä araman, diňe täze ýeňiş ugrunda göreşeris" diýip, futbolçy nygtady. Elman Tagaýewiň bu sözleri toparyň ýaryş ýoluna nähili jogapkärli çemeleşýändigini görkezýär.

Häzirki wagtda "D" toparçasynda Türkmenistanyň ýygyndysy öňde barýar. 2027-nji ýylda Saud Arabystanynda geçiriljek Aziýa Kubogyna ýollanma almak üçin Meredowyň şäkirtlerine hatda deňme-deň netije hem ýeterlikdir. Emma ýygyndymyzyň agzalarynyň diňe ýeňiş ugrundaky tutumy janköýerleriň umydyny has-da artdyrýar. Bu uly gyzyklanma döredýän duşuşyk Aşgabat wagty bilen sagat 17:30-da başlar.