Oýun sanawy
Ýewropanyň top-ligalarynda 2025/2026 möwsüminiň iň gowy futbolçylary yglan edildi
03 Sen. 12:38Ýewropanyň öňdebaryjy çempionatlary 2025/2026 möwsüminiň jemi boýunça iň gowy oýunçylaryny sylagladylar. Ispaniýanyň La Ligasynda Ispan futbolçylarynyň assosiasiýasy (AFE) tarapyndan «Barselonanyň» 19 ýaşly wingeri Lamin Ýamal möwsümiň iň gowy oýunçysy diýlip ykrar edildi. Ol Primeranyň 28 duşuşygynda 16 gol we 12 assist görkezijisini berjaý etdi.
Beýleki öňdebaryjy ligalaryň iň gowy oýunçylary we tälimçileri:
Angliýa (APL): PFA tarapyndan «Mançester Ýunaýtediň» kapitany Brunu Fernandeş iň gowy oýunçy saýlandy. Ol 21 assist bilen liganyň rekordyny goýdy. «Mançester Sitiniň» goragçysy Niko O'Raýli bolsa iň gowy ýaş oýunçy boldy.
Germaniýa (Bundesliga): «Bawariýanyň» hüjümçisi Harri Keýn «Ýylyň futbolçysy» diýlip saýlandy, Mýunhen klubynyň halypasy Winsan Kompani bolsa iň gowy tälimçi boldy.
Fransiýa (Liga 1): UNFP «PSŽ-niň» hüjümçisi Usman Dembeläni yzygiderli ikinji gezek möwsümiň iň gowy oýunçysy hökmünde yglan etdi.
Italiýa (Seriýa A): AIC tarapyndan «Interiň» goragçysy Federiko Dimarko iň gowy oýunçy diýlip saýlandy. «Komony» Çempionlar ligasyna çykaran Sesk Fabregas iň gowy tälimçi, toparyň hawbegi Niko Pas bolsa iň gowy ýaş oýunçy baýragyny aldy.
Şeýle hem okanyň
Türkmenistanyň agyr atletika boýunça milli ýygyndysy Hytaýda geçiriljek Dünýä çempionatyna gatnaşar
26 Okt. 08:09Türkmenistanyň agyr atletika boýunça milli ýygyndy topary 2026-njy ýylyň 27-nji oktýabry — 8-nji noýabry aralygynda Hytaýyň Ninbo şäherinde geçiriljek 91-nji Dünýä çempionatynda ýurdumyza wekilçilik eder. Halkara bäsleşikde Türkmenistanyň toparyny 10 sany türgen gorar. Zenanlaryň arasynda Ogulşat Amanowa, Şabnam Kerimbaýewa, Medine Amanowa, Gülälek Kakamyradowa we Anamjan Rustamowa çykyş ederler. Erkekleriň bäsleşiginde bolsa Didarbek Jumabaýew, Bektimur Reýimow, Gaýgysyz Töräýew, Rüstem Annaberdiýew hem-de Şahzadbek Mätýakubow dagylar platforma çykarlar.
Ninbodaky bu Dünýä birinjiligi Halkara agyr atletika federasiýasy (IWF) tarapyndan agram derejeleriniň täze ulgamy kabul edilenden soňky ilkinji iri ýaryş bolup durýar. IWF-niň reformalaryna laýyklykda, öňki 20 agram derejesiniň deregine indi medallar toplumy 16 ugur boýunça — erkekleriň we zenanlaryň hersinde 8 agram derejesinde oýnalar. Şeýle hem Hytaýda geçiriljek bu abraýly bäsleşik 2028-nji ýylda Los-Anjelesde (ABŞ) guraljak tomusky Olimpiýa oýunlaryna saýlama ýaryş hökmünde uly strategik ähmiýete eýedir.
Bellenilmeli zat, Hytaý öz taryhynda eýýäm ikinji gezek agyr atletika boýunça Dünýä çempionatyny kabul edýär; bu ýurtda ilkinji dünýä birinjiligi 1995-nji ýylda geçirilipdi. Türkmen türgenleriniň täze agram derejelerinde görkezjek netijeleri milli sportumyzyň halkara meýdançasyndaky ornuny pugtalandyrmaga we Olimpiýa lisenziýalaryny gazanmaga uly mümkinçilik döreder.
Blitz