Türkmenistanyň futbol boýunça milli ýygyndysy Aziýanyň Kubogy–2027-niň saýlama tapgyrynyň çäklerinde Tailandyň ýygyndysyna garşy geçiriljek iň möhüm oýna ykjam taýýarlyk görüp başlady. Türkmenistanyň Futbol federasiýasynyň habar berşi ýaly, bu duşuşyk ýygyndymyzyň halkara giňişligindäki geljegi üçin uly ähmiýete eýedir. Häzirki wagtda ýygyndy paýtagtymyz Aşgabatda okuw-türgenleşik ýygnanyşygyny geçirip, futbolçylaryň fiziki we taktiki taýýarlygyna aýratyn üns berilýär.

Milli ýygyndynyň baş tälimçisi Röwşen Meredowyň ýolbaşçylygynda türgenleşikler günde iki gezek alnyp barylýar. Tälimçiler düzümi Tailandyň ýygyndysynyň oýun stilini jikme-jik seljerip, oňa garşy täsirli taktika düzmegiň üstünde işleýärler. Paýtagtdaky türgenleşikler diňe bir fiziki durnuklylygy däl, eýsem oýunçylaryň özara sazlaşygyny we hüjüm bilen goragyň utgaşyklygyny kämilleşdirmäge gönükdirilendir.

Häzirki wagtda saýlama tapgyryň «D» toparçasynda örän çekeleşikli ýagdaý ýüze çykdy. Bäş tapgyrdan soň Türkmenistanyň we Tailandyň ýygyndylary 12 utuk bilen öňde barýarlar, ýöne goşmaça görkezijiler boýunça biziň futbolçylarymyz liderlik edýärler. Aşgabatda geçirilen ilkinji duşuşykda Türkmenistanyň 3:1 hasabynda gazanan ynamly ýeňşi toparymyzyň strategik artykmaçlygyny has-da berkitdi. Toparçada üçünji orny 6 utuk bilen Şri-Lanka eýeleýär, Hytaý Taýbeýi bolsa heniz utuk gazanyp bilmedi.

Toparçalaýyn tapgyryň aýgytlaýjy duşuşygy 31-nji martda Bangkok şäherindäki meşhur «Rajamangala» stadionynda geçiriler. Bu oýnuň ýeňijisi gönümel Saud Arabystanynda geçiriljek Aziýanyň Kubogy–2027-niň final bölegine gatnaşmaga hukuk gazanar. Türkmen futbolçylary bu taryhy pursady ulanmak we ýurdumyzyň futbolyny täze belentliklere götermek üçin ähli tagallalaryny gaýgyrmajakdyklaryna ynandyrýarlar.