Oýun sanawy
FIFA guramasy Müsüriň milli ýygyndysyndan 2026-njy ýylyň dünýä çempionatynyň oýunlarynda geýjek sport lybaslarynyň ýüzündäki ýedi sany ýyldyzy aýyrmagy resmi taýdan talap etdi. Bu barada sport žurnalisti Maýki Žunior «X» (öňki Twitter) sosial ulgamyndaky şahsy sahypasynda habar berdi.
Müsürlileriň sport geýiminiň we topar nyşanynyň ýokarsynda ýerleşdirilen ýedi ýyldyz bu ýurduň Afrika Milletler kubogynda gazanan ýedi sany taryhy ýeňşini aňladýar. Emma FIFA-nyň resmi düzgünnamasyna laýyklykda, guramanyň howandarlygynda guralýan dünýä birinjilikleriniň final tapgyrynda lybaslaryň ýüzünde diňe Dünýä çempionatynda gazanylan çempionlyklar üçin ýyldyz goýmaga rugsat berilýär. Yklym derejesindäki titullary aňladýan belligi bolsa diňe saýlama oýunlarda we ýoldaşlyk duşuşyklarynda ulanmak bolar.
Mundan başga-da, müsürli futbolçylara oýun köýnekçeleriniň arkasyndaky belgilerini we familiýalaryny altyn öwüşginli reňklerde ýazmak hem gadagan edildi. Ýatladyp geçsek, 2026-njy ýylyň Dünýä çempionaty häzirki wagtda ABŞ-nyň, Kanadanyň we Meksikanyň ýaşyl meýdançalarynda dowam edýär. Müsür bu ýaryşyň «G» toparçasynda Belgiýanyň, Täze Zelandiýanyň we Eýranyň ýygyndylary bilen güýç synanyşýar.
Şeýle hem okanyň
Lionel Messi sporty ösdürmäge goşan goşandy üçin abraýly Asturiýa şa gyzynyň baýragyna mynasyp boldy
24 Okt. 10:17«Altyn top» baýragynyň sekiz gezek eýesi, meşhur argentinaly futbolçy Lionel Messi dünýä sportuny ösdürmäge goşan göz-görtele goşandy üçin Ispaniýanyň halkara derejesindäki abraýly Asturiýa şa gyzynyň baýragy bilen sylaglandy. Baýragy gowşurmak dabarasy Ispaniýanyň Owýedo şäherindäki taryhy «Kampoamor» teatrynda uly danyşyklylyk bilen geçirildi. Bu barada sylaglaýjy gaznanyň resmi internet saýtynda habar berilýär.
Asturiýa şa gyzynyň halkara baýragy 1980-nji ýyldan bäri dünýä boýunça dürli ugurlarda, şol sanda sportda uly üstünlik gazanan görnükli şahsyýetlere gowşurylyp gelinýär. Sport kategoriýasy boýunça bu derejeli baýraga ozal meşhur tennisçi Serena Wilýams, ispan futbolçylary Iker Kasilýas we Hawi, şeýle hem Braziliýanyň hem-da Ispaniýanyň milli ýygyndylary mynasyp bolupdylar.
Häzirki wagtda 39 ýaşly Messi Amerikan Ligasynda (MLS) «Inter Maýami» klubynyň düzüminde çykyş edýär. Öz oýunçylyk karýerasynda «Barselona» we «Pari Sen-Žermen» ýaly öňdebaryjy klublarda oýnan Argentinanyň milli ýygyndysynyň kapitany 2022-nji ýylda Dünýä çempiony boldy ham-da karýerasynda jemi 48 sany resmi kubok we kubok titullaryny utup, futbol taryhynda iň köp titully oýunçy hökmünde öz adyny altyn harplar bilen ýazdyrdy.
Blitz