Türkmenistanyň Futbol federasiýasy ýurduň sport taryhynda ilkinji gezek ýetginjekler toparlarynyň arasynda iki ýaş derejesi boýunça — 15 ýaşa çenli we 17 ýaşa çenli futbolçylaryň gatnaşmagynda milli birinji ýaryşy guraýar. Bu ýaryşlara Türkmenistanyň Ýokary ligasynyň klublarynyň ýanynda döredilen ýörite ýetginjekler toparlary gatnaşýarlar. Täze ligalaryň döredilmegi ýurtda professional futbolyň binýadyny berkitmäge we ýaş zehinleri ýüze çykarmaga gönükdirilendir.

17 ýaşa çenli futbolçylaryň arasyndaky birinji ýaryş 23-nji martda resmi taýdan başlandy. Bu ýaş derejesinde jemi sekiz topar — «Arkadag», «Ahal», «Altyn Asyr», «Şagadam», «Nebitçi», «Aşgabat», «Köpetdag» we «Merw» çykyş edýärler. Eýýäm birinji tapgyryň oýunlary gyzykly pursatlara baý boldy: «Ahal» topary «Şagadamy» 3:0 hasabynda ýeňlişe sezewar etdi, «Merw» bolsa «Köpetdagdan» 5:1 hasabynda üstün çykdy. «Nebitçi» bilen «Altyn Asyryň», şeýle-de «Aşgabat» bilen «Arkadagyň» duşuşyklary 1:1 hasabyndaky deňlik bilen tamamlandy.

15 ýaşa çenli ýetginjekleriň arasyndaky çempionat bolsa 24-nji martda öz badalgasyny alýar. Bu ýaryşda hem ýokarda agzalan sekiz sany esasy klubyň ýetginjekler toparlary güýç synaşarlar. Iki ýaş derejesindäki ýaryşlar hem meýilnama boýunça iki aýlawdan ybarat bolar. Bu bolsa ýaş futbolçylara möwsümiň dowamynda yzygiderli oýun tejribesini toplamana we öz ussatlyklaryny kämilleşdirmäge giň mümkinçilik berer.

Hünärmenleriň bellemegine görä, şeýle yzygiderli ligalaryň ýola goýulmagy milli ýygyndy toparlar üçin ätiýaçlyk güýçleri taýýarlamakda möhüm ädimdir. Ýaş derejeleri boýunça geçirilýän çempionatlar diňe bir bäsdeşlik ruhuny ösdürmän, eýsem klublaryň akademiýalarynyň işiniň netijeliligini hem görkezýär. Ýaryşyň netijeleri boýunça iň oňat netije görkezen ýaşlar geljekde ýurduň esasy toparlarynyň hataryna goşulmaga mümkinçilik alarlar.