ABŞ-nyň Günorta we Merkezi Aziýa boýunça ýörite wekili, ilçi Serjio Gor 2026-njy ýylyň 22–23-nji ýanwarynda Türkmenistana iş saparyny amala aşyrýar. Bu sapar Türkmenistan bilen Amerikanyň Birleşen Ştatlarynyň arasyndaky hyzmatdaşlygyň ösüşine gönükdirilendir.

Resmi maglumatlara görä, saparyň dowamynda ýörite wekil Türkmenistanyň ýokary derejeli döwlet ýolbaşçylary hem-de işewür toparlaryň wekilleri bilen birnäçe möhüm duşuşyklary geçirer. Gepleşiklerde ikitaraplaýyn hyzmatdaşlygyň täze ugurlaryny ösdürmek, sebit durnuklylygyny pugtalandyrmak we Türkmenistan bilen ABŞ-nyň arasyndaky ykdysady gatnaşyklary giňeltmek meseleleri ileri tutulýar.

Amerikan tarapynyň bellemegine görä, ABŞ Türkmenistan bilen sebitde abadançylygy, howpsuzlygy we durnukly ösüşi üpjün etmäge gönükdirilen, iki tarapa-da peýda getirjek hyzmatdaşlygyň täze mümkinçiliklerini ara alyp maslahatlaşmaga uly gyzyklanma bildirýär.

ABŞ-nyň ýörite wekiliniň bu sapary türkmen-amerikan gatnaşyklarynyň yzygiderli ösýändigini, şeýle hem Türkmenistan bilen ABŞ-nyň arasynda syýasy, söwda-ykdysady hyzmatdaşlygy has-da çuňlaşdyrmaga bolan özara islegi aýdyň görkezýär.