Şu gün Türkmenistanyň daşary işler ministriniň orunbasary Mähri Bäşimowa BMG-niň Taslamalara hyzmat etmek boýunça müdirliginiň (UNOPS) Awstriýadaky köp ýurtly edarasynyň direktory Simonetta Siligato bilen resmi duşuşyk geçirdi. Gepleşikleriň dowamynda taraplar Türkmenistanyň halkara guramalar, aýratyn-da UNOPS bilen ýola goýan hyzmatdaşlygynyň häzirki ýagdaýyna ýokary baha berdiler we birnäçe ugurlar boýunça özara gatnaşyklaryň netijeli häsiýete eýedigini aýratyn bellediler.

Duşuşygyň esasyny dünýäniň öňümizdäki ýyllardaky iň möhüm meseleleriniň biri bolan howa gün tertibi we parnik gazlarynyň, hususan-da, metan gazynyň zyňyndylaryny azaltmaga gönükdirilen ekologik maksatnamalary durmuşa geçirmek meseleleri gurady. Taraplar bilelikdäki taslamalary durnukly esasda alyp barmak maksady bilen, 2026 — 2030-njy ýyllar üçin Metan zyňyndylaryny azaltmak boýunça bilelikdäki maksatnamanyň taslamasyny işläp taýýarlamagyň anyk ugurlaryny kesgitlediler.

Gepleşikleriň dowamynda Türkmenistanyň Ählumumy metan borçnamasyndan gelip çykýan halkara wezipeleri we borçlary doly hem-de öz wagtynda ýerine ýetirmek boýunça özara hyzmatdaşlygyň täze gurallaryna seredildi. Şunda ugurdaş döwlet edaralarynyň we halkara bilermenleriň derejesindäki gatnaşyklary has-da işjeňleşdirmäge, ekologik howpsuzlygy üpjün etmekde bilelikdäki tagallalary utgaşdyrmaga taraplaryň doly taýýardyklary we uly gyzyklanma bildirýändikleri tassyklanyldy.

Duşuşygyň netijeleri boýunça taraplar howa üýtgemeleri we durnukly ösüş babatda sebit hem-de halkara başlangyçlaryň çäklerinde netijeli dialogy yzygiderli dowam etdirmek barada ylalaşdylar. Bu duşuşyk Türkmenistanyň daşky gurşawy goramak we «ýaşyl ykdysadyýet» ýörelgelerini ornaşdyrmak ugrunda halkara giňişlikde alyp barýan ekologiýa diplomatiýasynyň nobatdaky möhüm ädimine öwrüldi.