Türkmenistanyň Daşary işler ministrliginiň binasynda Türkmenistan bilen Ýewropa Bileleşiginiň arasynda Adam hukuklary boýunça on sekizinji dialog geçirildi. Resmi duşuşyga ýurduň birnäçe ministrlikleriniň, pudak edaralarynyň wekilleri hem-de halkara bilermenler gatnaşdylar. Mejlisiň işine Türkmenistanyň Daşary işler ministriniň orunbasary Mähri Bäşimowa we Ýewropa Bileleşiginiň Daşary aragatnaşyklar gullugynyň sebit boýunça ýolbaşçysy Ditmar Krissler bilelikde ýolbaşçylyk etdiler.

Duşuşygyň dowamynda taraplar milli kanunçylygy döwrebaplaşdyrmak, hukuk tertibini hem-de kanunyň hökmürowanlygyny pugtalandyrmak, gender deňligini üpjün etmek ýaly wajyp ugurlar boýunça giňişleýin pikir alyşdylar. Türkmen wekilleri ýurtda demokratik institutlary ösdürmek, adam hukuklaryny goramak boýunça milli meýilnamalary üstünlikli durmuşa geçirmek hem-de bu ugurdaky halkara hyzmatdaşlygy berkitmek boýunça alnyp barylýan yzygiderli ädimler barada maglumat berdiler.

Ýewropa Bileleşiginiň wekilleri öz gezeginde gatnaşyjylary halkara guramanyň gender deňligi babatdaky strategiýasynyň esasy ugurlary bilen tanyşdyryp, deň hukuklary üpjün etmekde öňdebaryjy tejribeleri alyşmagyň ähmiýetini nygtadylar. Özara hormat goýmak ýörelgelerine esaslanan bu ynsanperwer dialogyň netijeleri boýunça taraplar geljekde hem konstruktiw gatnaşyklary yzygiderli dowam etdirmäge taýýardyklaryny tassykladylar.