Tokio şäherinde Türkmenistanyň Halkara ynsanperwer ylymlary we ösüş uniwersitetiniň wekilleriniň Ýaponiýanyň ylmy we bilim edaralarynyň ýolbaşçylary bilen duşuşyklary geçirildi. Gepleşikleriň dowamynda okuw maksatnamalaryna innowasion tehnologiýalary ornaşdyrmak we akademiki alyş-çalyşygy giňeltmek meselelerine esasy üns berildi. Taraplar häzirki zaman sanly ykdysadyýetiniň talaplaryna laýyk gelýän hünärmenleri taýýarlamaga taýýardyklaryny tassykladylar.

Türkmen-ýapon ylmy-tehnologik assosiasiýasynyň ýolbaşçylary bilen bolan söhbetdeşlikde KOSEN bilim ulgamyny ornaşdyrmak we daşary ýurt dillerini çuňlaşdyryp öwrenmek boýunça teklipler ara alnyp maslahatlaşyldy. Bilim we ylym ulgamyndaky hyzmatdaşlygy täze derejä çykarmak üçin ynsanperwer ugurlardaky taslamalary durmuşa geçirmegiň mehanizmleri seljerildi. Duşuşyga gatnaşan «Asia SEED» guramasynyň wekilleri meýilleşdirilýän başlangyçlaryň amaly ähmiýetini bellediler.

Ýaponiýanyň Halkara hyzmatdaşlyk agentliginiň (JICA) ýolbaşçylary bilen geçirilen maslahatda bilim maksatnamalaryna maliýe we tehniki taýdan goldaw bermek meseleleri öňe sürüldi. Gepleşikleriň netijesinde ýapon dili mugallymlarynyň alyş-çalyşygyny guramak we türkmen ýokary okuw mekdepleriniň binýadynda täze okuw ugurlaryny döretmek barada ylalaşyk gazanyldy. JICA bilen ýola goýulýan hyzmatdaşlyk iki ýurduň arasyndaky uzak möhletleýin akademiki gatnaşyklaryň binýadyny emele getirer.

Gepleşikleriň netijeli bölegi hökmünde JICA tarapy türkmen talyplaryny emeli aň ulgamy boýunça ýöriteleşdirilen okuwlara gatnaşmaga çagyrdy. «Maglumat ylymy we emeli aň bilen öz başarnygyňy aç» atly sanly ulgam arkaly geçiriljek bu gysga möhletli okuw, talyplara maglumatlary işläp taýýarlamagyň döwrebap usullaryny we emeli aň ulgamyndaky dünýä tejribesini öwrenmäge mümkinçilik berer.