Ýaponiýanyň paýtagtynda gulluk saparynda bolýan türkmen wekiliýeti kämil tehnologiýalar we döwrebap bilim ulgamy boýunça iki ýurduň arasyndaky strategiki hyzmatdaşlygy giňeltmek maksady bilen birnäçe ýokary derejeli duşuşyklary guraşdyrdy. Halkara ynsanperwer ylymlary we ösüş uniwersitetiniň wekilleri dünýäniň öňdebaryjy ylmy tejribelerini milli bilim ulgamyna ornaşdyrmak ugrunda anyk wezipeleri ara alyp maslahatlaşdylar.

Gepleşikleriň esasy bölegi Ýaponiýanyň bilim, medeniýet, sport, ylym we tehnologiýa ministrliginiň ýolbaşçy düzümi bilen alnyp banyldy. Duşuşykda türkmen ýaşlarynyň Gündogar Aziýanyň bu ösen döwletinde bilim almagyny höweslendirmek üçin meşhur MEXT talyp haklary maksatnamasy boýunça ýörite kwotalary we orunlary emele getirmek barada ylalaşyklar göz öňünde tutuldy. Esasy üns inženerçilik, emeli aň, STEM we ekologiýa ugurlaryna gönükdirildi.

Şeýle hem ýurdumyzyň ýokary okuw mekdeplerinde ýapon dili merkezlerini açmak, okuw kitaplary hem-de sanly serişdeler bilen üpjünçiligi gowulandyrmak barada anyk meýilnamalar bellenildi. Taslamanyň çäklerinde Ýaponiýanyň meşhur KOSEN görnüşli tehniki kollejleriniň bilim modelini Türkmenistanda ornaşdyrmak, robototehnika we «akylly» synp tehnologiýalary ugrunda bilelikdäki amaly ylmy barlaglary ýola goýmak bellenildi.

Mundan başga-da, wekiliýet agzalary Ýaponiýanyň «SPRIX Inc.» halkara guramasynyň ýolbaşçylary bilen duşuşyp, sanly bilim platformalaryny ösdürmek barada fikir alyşdylar. Bu ugurda talyplaryň bilim derejesine halkara ölçegler boýunça baha bermek üçin döwrebap TOFAS synaglaryny milli ulgama girizmek hem-de okuw maksatnamalaryna emeli aň innowasiýalaryny goşmak boýunça hyzmatdaşlygyň esasy ugurlary kesgitlenildi.