Türkmenistanyň we Eýranyň arasynda bilelikdäki söwda zolagyny döretmek boýunça ikinji iş duşuşygy Ykdysady hyzmatdaşlyk guramasynyň (YHG) çäklerinde Eýranyň Golestan welaýatynda geçirildi. Bu barada Türkmenistanyň Daşary işler ministrligi habar berdi.

Duşuşyga YHG-niň wekilleri, şeýle hem iki ýurduň söwda, serhet we gümrük edaralarynyň ýolbaşçylary gatnaşdylar. Taraplar «Altyn Asyr» – «Bajgiran» serhet geçelgesinde söwda bazaryny döretmegiň mümkinçiliklerini ara alyp maslahatlaşdylar.

Türkmenistanyň wekiliýeti serhet we sebit söwdasynyň mümkinçiliklerini doly peýdalanmagyň, şeýle hem YHG agza döwletleriň arasyndaky haryt dolanyşygyny artdyrmagyň ähmiýetini belledi. Bu ugur Prezident Serdar Berdimuhamedow tarapyndan hem guramanyň döwlet Baştutanlarynyň duşuşygynda nygtalypdy.

Duşuşykda wiza we gümrük düzgünlerini ýeňilleşdirmek, söwdaçylaryň ugry boýunça ätiýaçlandyryş ulgamyny döretmek hem-de taslama üçünji ýurtlaryň maýa goýumlaryny çekmek meseleleri ara alnyp maslahatlaşyldy.

YHG-niň wekilleri bu taslamanyň guramanyň agza ýurtlary üçin nusgalyk bilelikdäki başlangyç boljakdygyny aýtdylar. Taraplar «Altyn Asyr» – «Inçeburun» serhet geçelgesinde söwda zolagyny döretmek boýunça şertnama taslamasyny we hereket meýilnamasyny taýýarlamaga ylalaşdylar.

Günüň ikinji ýarymynda Türkmenistanyň wekiliýeti söwda zolagynyň guruljak ýerine baryp gördüler. Eýran tarapy gümrük nokadynyň işini pandemiýa çenli bolan derejä doly dikeltmäge we bu işe paralel ýagdaýda söwda zolagyny gurmaga taýýardygyny mälim etdi.

Duşuşygyň ahyrynda indiki iş toparynyň ýygnagyny Türkmenistanda geçirmek teklip edildi.