Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow HHR-niň Döwlet Geňeşiniň Premýeriniň birinji orunbasary Din Sýuesýan bilen duşuşyk geçirdi. Hytaýly wekil HHR-niň Başlygy Si Szinpiniň mähirli salamyny ýetirip, öz ýurdunyň Türkmenistan bilen ýola goýlan gatnaşyklara ýokary baha berýändigini nygtady. Iň ýokary derejedäki yzygiderli gepleşikler iki döwletiň arasyndaky ynamdar gatnaşyklaryň we täze taslamalaryň esasy binýady bolup hyzmat edýär.

Duşuşygyň barşynda halkara giňişlikdäki utgaşykly hereketlere, aýratyn-da, BMG-niň we «Merkezi Aziýa — Hytaý» formatynyň çäklerindäki hyzmatdaşlyga üns çekildi. Taraplar dünýä derejesindäki möhüm meseleler boýunça garaýyşlarynyň meňzeşdigini tassykladylar. Halkara guramalaryň çäklerinde birek-biregiň başlangyçlaryna goldaw berilmegi Türkmenistan bilen Hytaýyň arasyndaky syýasy ynamyň we dostlukly gatnaşyklaryň durnuklydygyny görkezýär.

Ykdysady hyzmatdaşlygyň özeni hökmünde ýangyç-energetika ulgamyna aýratyn ähmiýet berildi. Hytaýly hyzmatdaşlar bilen «Galkynyş» gaz käniniň nobatdaky tapgyrlaryny özleşdirmek boýunça alnyp barylýan işler we energetika taslamalarynyň geljegi ara alnyp maslahatlaşyldy. Geçirilen söhbetdeşlikde strategik häsiýetli gaz geçirijiniň netijeli işledilmeginiň ikitaraplaýyn gatnaşyklaryň üstünlikli amala aşyrylýandygynyň aýdyň nusgasydygy bellenildi.

Energetikadan başga-da, ulag-logistika we ýokary tehnologiýalar ulgamlary hyzmatdaşlygyň geljegi uly ugurlary hökmünde görkezildi. Türkmenistanyň ulag strategiýasynyň Hytaýyň «Bir guşak, bir ýol» başlangyjy bilen utgaşdyrylmagy täze üstaşyr geçelgeleri döretmek üçin giň mümkinçilikleri açýar. Gepleşikleriň ahyrynda taraplar köpugurly hyzmatdaşlygyň mundan beýläk-de iki halkyň bähbidine ösdüriljekdigine ynam bildirdiler.