Türkmenistanyň Söwda-senagat edarasynda Yrak Respublikasynyň Kerkuk şäheriniň Söwda-senagat edarasynyň başlygy S.al-Salihi bilen sanly ulgam arkaly netijeli gepleşik geçirildi. Wideoaragatnaşyk arkaly guralan bu çärä Yrak Respublikasynyň Türkmenistandaky ilçihanasynyň işlerini wagtlaýyn ynanylan wekili J.al-Attar hem işjeň gatnaşdy. Taraplar ikitaraplaýyn söwda-ykdysady gatnaşyklarynyň we özara bähbitli hyzmatdaşlygyň täze mümkinçiliklerini giňişleýin ara alyp maslahatlaşdylar.

Türkmen tarapy ýurduň dokma, azyk, ýeňil senagat hem-de deri harytlaryny yrak bazaryna uly möçberde eksport etmäge doly taýýardygyny mälim etdi. Öz gezeginde yrakly wekiller Kerkuk şäheriniň sebitdäki strategik we senagat ähmiýetine aýratyn ünsi çekip, geljekde türkmen telekeçilerinden ybarat wekilçilikli topary öz ýurtlarynda garşylamaga hem-de täze hyzmatdaşlyk platformalaryny döretmäge uly isleg bildirdiler. Jogap hökmünde türkmen tarapy yrakly işewürleri Aşgabatda guraljak «Türkmenistanyň gurluşyk, senagat, himiýa, energetika pudaklarynyň ösüşi» atly halkara sergisine resmi taýdan çagyrdy.