26-njy maýda Nýu-Ýork şäherinde Türkmenistanyň daşary işler ministri Raşid Meredow bilen BMG-niň Baş sekretarynyň orunbasary, Az derejede ösen, deňze çykalgasy bolmadyk ösüp barýan ýurtlar hem-de kiçi ada döwletler boýunça Ýokary wekili Rarab Fatima duşuşdy. Türkmenistanyň DIM-iniň saýtynda habar berlişi ýaly, duşuşykda taraplar deňze çykalgasy bolmadyk döwletleriň bähbitlerini halkara meýdançalarynda goramak we köptaraplaýyn hyzmatdaşlygy täze derejä çykarmak baradaky meseleleri ara alyp maslahatlaşdylar.

Gepleşikleriň özenini 2024–2034-nji ýyllar üçin Hereketleriň Awaza maksatnamasyny hem-de Awaza syýasy Jarnamasyny durmuşa geçirmegiň anyk we amaly gurallaryny kesgitlemek meselesi emele getirdi. Türkmen tarapy deňze çykalgasy bolmadyk ýurtlaryň Dostlar toparynyň bilelikdäki başlygy hökmünde bu resminamalaryň diňe bir kagyz ýüzünde galman, eýsem sebitara ulag-logistika taslamalarynda işjeň ulanylmagyna ýardam etjekdigini tassyklady.

Mundan başga-da, diplomatlar LLDC ýurtlarynyň durnukly ösüşini üpjün etmekde we bäsdeşlige ukyplylygyny ýokarlandyrmakda möhüm bolan birnäçe ugurlary bany dördüler. Şunuň bilen baglylykda, daşky gurşawy goramak, durnukly energetika, suw diplomatiýasy, ulgamlary sanlylaşdyrmak we aýlawly (tsirkulyar) ykdysadyýete geçmek ýaly häzirki zamanyň wajyp meseleleri boýunça BMG-niň edaralary bilen hyzmatdaşlygy mundan beýläk-de çuňlaşdyrmagyň zerurdygy nygtaldy.