Merkezi Aziýa sebit ykdysady hyzmatdaşlygy (SAREC) maksatnamasynyň Iş toparynyň üçünji ýyllyk mejlisinde Türkmenistanyň Bilim ministrliginiň wekilleri gatnaşdylar. Ministriň orunbasary Azat Ataýewiň ýolbaşçylygyndaky wekiliýet tarapyndan ýurduň bilim syýasatynda «ýaşyl» endikleri ösdürmek we zähmet bazarynyň täze talaplaryna uýgunlaşmak boýunça amala aşyrylýan işler tanyşdyryldy. Bu halkara platformasy sebitdäki ýokary we hünär bilimini döwrebaplaşdyrmakda möhüm orun tutýar.

Türkmenistan SAREC-iň çäklerindäki hyzmatdaşlygy strategik ugur hökmünde garap, eýýäm halkara tejribesini milli bilim maksatnamalaryna ornaşdyrmaga başlady. Alnan täze bilimler we usulyýetler adalatly ykdysady geçişi üpjün etjek hünärleri çaklamakda hem-de talyplarda ekologiýa medeniýetini kemala getirmekde ulanylýar. Şeýle çemeleşme ýurduň ykdysadyýetiniň durnukly ösüşine we tehnologik taýdan kämilleşmegine göni ýardam berýär.

Mejlisiň netijeleri 2026 — 2052-nji ýyllar üçin niýetlenen Türkmenistanyň ýokary bilimi ösdürmegiň Strategiýasyny durmuşa geçirmekde uly ähmiýete eýe bolar. Hususan-da, geljekde isleg bildiriljek hünärleri öňünden kesgitlemek we okuw meýilnamalarynyň mazmunyny täzelemek meselelerine aýratyn üns berler. Bu bolsa ýokary okuw mekdepleriniň bäsleşige ukyplylygyny artdyrmaga we halkara uniwersitet hyzmatdaşlygynyň täze ugurlaryny açmaga mümkinçilik berer.

Bu halkara taslamasyna gatnaşmak ýurduň ýokary okuw mekdepleriniň ylmy-barlag kuwwatyny has-da berkitmäge ýol açýar. Döwrebap bilimli, täzeçe pikirlenýän we «ýaşyl» tehnologiýalardan başy çykýan hünärmenleri taýýarlamak Türkmenistanyň bilim ulgamynyň esasy wezipeleriniň biri hökmünde kesgitlendi. Ministrligiň resmi maglumatlaryna görä, geçirilen duşuşygyň netijeleri ýurduň bilim pudagyndaky halkara standartlarynyň berkarar edilmegine goşant goşar.