Türkmenistanyň ýokary okuw mekdepleri M.W.Lomonosow adyndaky Moskwa döwlet uniwersiteti tarapyndan guralýan «Lomonosow-2026» atly halkara ýaşlar ylmy forumyna gatnaşar we onuň möhüm bölümleriniň geçirilmegine eýeçilik eder. Türkmenistanyň Bilim ministrliginiň habar berşi ýaly, bu hyzmatdaşlyk ýurdumyzyň ylym-bilim ulgamynyň halkara giňişligine işjeň goşulyşýandygynyň aýdyň subutnamasydyr. Şeýle abraýly çäräniň bir böleginiň Aşgabatda geçirilmegi türkmen talyplaryna we ýaş alymlaryna öz ylmy açyşlaryny halkara derejesinde tanyşdyrmaga giň ýol açýar.

2026-njy ýylyň 10-njy we 25-nji apreli aralygynda geçiriljek forumyň çäginde talyplaryň, aspirantlaryň we ýaş alymlaryň XXXIII halkara ylmy maslahaty guralar. Bu ýyl maslahatyň bölümleri diňe bir Moskwada däl, eýsem, uniwersitetiň daşary ýurtlardaky hyzmatdaş okuw mekdeplerinde hem işlär. Türkmenistanda bu halkara ylmy meýdançalar Döwletmämmet Azady adyndaky Türkmen milli dünýä dilleri institutynyň hem-de Magtymguly adyndaky Türkmen döwlet uniwersitetiniň binýadynda guralar we ylmyň dört ugry boýunça maslahatlar geçiriler.

Ylmy maslahata gatnaşmaga 35 ýaşa çenli bolan zehinli ýaşlar — talyplar, magistrantlar we ýaş alymlar çagyrylýar. Gatnaşmak isleýänler 2026-njy ýylyň 6-njy apreline çenli «Lomonosow» ylym-bilim portalynda hasaba durmalydyrlar. Maslahatyň rus we iňlis dillerinde geçirilmegi ýaşlaryň arasynda dünýä derejesindäki ylmy pikir alyşmalaryň kämilleşmegine we täze gatnaşyklaryň ýola goýulmagyna ýardam eder. Gatnaşmagyň tölegsiz bolmagy bolsa bilimli we täzeçil pikirli ýaşlaryň ählisi üçin deň mümkinçilikleri döredýär.

Forumyň netijeleri boýunça gatnaşyjylara ýörite sertifikatlar gowşurylar, iň oňat we döwrebap ylmy işleriň awtorlary bolsa ýokary derejeli diplomlar bilen sylaglanarlar. Bu halkara sylaglar ýaş alymlaryň geljekki hünär ösüşinde we ylmy basgançaklarynda möhüm orun tutar. «Lomonosow-2026» forumynyň Aşgabatda guralmagy Türkmenistanyň ylym-bilim syýasatynyň dünýä ülňülerine laýyk gelýändigini we ýurdumyzyň sebitde iri ylmy merkez hökmündäki abraýynyň barha artýandygyny tassyklaýar.