Ylymlar güni mynasybetli paýtagtymyzda guralan halkara ylmy-amaly maslahat daşary ýurtly hyzmatdaşlar bilen gatnaşyklary ösdürmekde möhüm ädim boldy. Oguz han adyndaky Inžener-tehnologiýalar uniwersitetinde göni we onlaýn ulgam arkaly geçirilen bu çäräniň çäginde ikitaraplaýyn ylalaşyklaryň bäşisine gol çekildi. Täze ylalaşyklar ýokary bilim ulgamynda innowasion tehnologiýalary ornaşdyrmaga we bilelikdäki ylmy taslamalary durmuşa geçirmäge uly itergi berer.

Katar Döwleti we Malaýziýa bilen dörän täze gatnaşyklar talyp we mugallym alyş-çalşygyny guramaga şert döredýär. Dohanyň ylym we tehnologiýalar uniwersiteti bilen özara düşünişmek hakynda ylalaşyk gazanylan bolsa, Malaýziýanyň Tenaga milli uniwersiteti bilen ýörite mobillik maksatnamasyny amala aşyrmak barada ylalaşyk baglaşyldy. Bu resminamalar talyplaryň halkara tejribesini artdyrmaga we dünýä dilli hünärmenleri kemala getirmäge gönükdirilendir.

Şeýle hem maslahatyň dowamynda innowasiýalary we tehnologik açyşlary önümçilige ornaşdyrmak meselelerine aýratyn üns berildi. Şu maksat bilen, Türkiýäniň «METABIO Biotechnology» kompaniýasy bilen biotehnologiýa ugrunyzda hyzmatdaşlyk etmek barada Ähtnama gol çekildi. Bu bolsa uniwersitetiň ylmy-barlag institutlarynda taýýarlanýan taslamalary tejribede we önümçilikde ulanmaga täze giň mümkinçilikleri açýar.

Gündogar Aziýa sebiti bilen gatnaşyklar Hytaý Halk Respublikasynyň iki sany iri ýokary okuw mekdebi bilen berkidildi. Hytaýyň Şanhaý ylym we tehnologiýalar uniwersiteti hem-de Çanan uniwersiteti bilen gol çekilen resminamalar geljekde bilelikde ylmy barlaglary geçirmäge we sanly ulgamy ösdürmäge şert döredýär. Baglaşylan ylalaşyklar gatnaşyjy ýurtlaryň arasyndaky däp bolan dostlukly gatnaşyklary täze belentliklere götermek üçin berk binýat boldy.