Mary welaýatynyň maliýe-ykdysady orta hünär okuw mekdebiniň talyby Maksatmyrat Ýardymow Gazagystanyň paýtagty Astana şäherinde onlaýn tertipde geçirilen «Merkezi Aziýanyň iň gowy talyby» atly halkara bäsleşiginde I derejeli baýraga mynasyp boldy. II ýyl talyby bolan ýaş hünärmen sebitdäki iň zehinli ýaşlaryň arasynda ýokary netije görkezip, öz okuw mekdebiniň we ýurdumyzyň adyny halkara derejesinde dabaralandyrdy.

Bu abraýly sylag türkmen talybyna Merkezi Aziýa sebitinde ýaşlar syýasatyny ösdürmekdäki işjeňligi we bilim ulgamynda gazanan şahsy üstünlikleri üçin berildi. Bilim ministrliginiň habar bermegine görä, Maksatmyrat Ýardymowyň halkara derejesindäki bu ýeňşi türkmen ýaşlarynyň döwrebap bilim almaga bolan höwesiniň we zehininiň aýdyň subutnamasydyr. Bäsleşik sebit ýurtlarynyň arasynda ylmy we medeni gatnaşyklary pugtalandyrmaga gönükdirildi.

Ýeňiji bolan talyba bäsleşigiň guraýjylary tarapyndan I derejeli diplom, ýörite kubok, şahadatnama we halkara derejeli döş nyşany gowşuryldy. Bu sylaglar ýaş talybyň geljekki ylmy we hünär ýolunda uly ruhlandyryjy güýç bolup hyzmat eder. Bäsleşigiň netijeleri diňe bir şahsy däl, eýsem Türkmenistanyň orta hünär bilimi ulgamynyň gazanýan üstünlikleriniň hem görkezijisidir.

Halkara bäsleşigini Gazagystanyň «Žaňa Қazaқstan» innowasion merkezi we «Bilim örkenieti» atly ylmy-barlag merkezi bilelikde gurady. Şeýle çäreler ýaşlaryň arasynda tejribe alyşmaga we innowasion taslamalaryň öňe sürülmegine amatly şertleri döredýär. Türkmenistanda ýaş zehinleri ýüze çykarmak we olary halkara bäsleşiklerine taýýarlamak boýunça amala aşyrylýan döwlet syýasaty özüniň oňyn miwelerini bermegini dowam edýär.