Türkmen döwlet mugallymçylyk institutynyň täze gurulýan binalar toplumynyň ylmy-barlamhana binýady Hytaý Halk Respublikasynyň öňdebaryjy tejribeleri esasynda enjamlaşdyrylar. Bu ugurda halkara hyzmatdaşlygy ösdürmek maksady bilen, ýokary okuw mekdebiniň wekilleri Hytaýyň iri ylym-bilim merkezlerine iş saparyny amala aşyrdylar. Saparyň barşynda hytaýly hünärmenleriň täze nesil barlamhana enjamlaryny okuw işinde ulanmak baradaky tejribeleri jikme-jik öwrenildi.

Iş saparynyň meýilnamasyna laýyklykda, türkmen wekiliýeti Pekiniň we Şandunyň pedagogika uniwersitetlerinde bolup, ol ýerdäki sanly bilim gurşawy bilen tanyşdylar. Esasy üns täze binalar toplumynda gurnaljak döwrebap barlamhanalaryň maddy-tehniki üpjünçiligini kämilleşdirmäge we innowasion enjamlaryň netijeli ulanylyşyny ýola goýmaga gönükdirildi. Şeýle hem enjamlary öndürýän kärhanalarda bolan duşuşyklar hünärmenlere täze tehnologiýalaryň aýratynlyklaryny öndürijiniň özünden öwrenmäge mümkinçilik berdi.

Hytaýyň ýokary okuw mekdepleriniň barlamhana we ylmy-usulyýet tejribesiniň özleşdirilmegi institutyň ylmy kuwwatyny has-da artdyrmaga ýardam eder. Bu başlangyç sanly bilim ulgamyndaky ikitaraplaýyn gatnaşyklary täze derejä çykarmak bilen bir hatarda, talyplar üçin dünýä ülňülerine laýyk gelýän okuw şertlerini döretmäge gönükdirilendir. Döwrebap tehnologiýalaryň ornaşdyrylmagy geljekki mugallymlaryň professional taýýarlygynyň hilini ýokarlandyrmaga mümkinçilik berer.

Täze binalar toplumynyň işe girizilmegine täze okuw ýylynyň ilkinji günlerinde garaşylýar. Institutyň maddy-tehniki binýadynyň düýpli döwrebaplaşdyrylmagy ýurduň bilim ulgamyny sanlylaşdyrmak baradaky döwlet maksatnamalarynyň durmuşa geçirilmeginde möhüm ädim bolar. Halkara tejribäniň we innowasion çözgütleriň utgaşdyrylmagy ýokary okuw mekdebiniň bäsdeşlige ukyplylygyny üpjün edýän esasy faktorlaryň biridir.