ÝHHG-niň Aşgabatdaky merkeziniň guramagynda Türkmenistanyň media wekilleri Portugaliýanyň paýtagty Lissabon şäherinde iş saparynda boldular. Saparyň çäklerinde amala aşyrylan duşuşyklar teleradioýaýlym ulgamyny ösdürmek boýunça halkara tejribe alyşmaga gönükdirildi. Türkmen wekilleri Portugaliýanyň iň iri jemgyýetçilik teleradiokompaniýasy bolan RTP-niň baş edarasyna baryp, olaryň iş usullary we tehniki enjamlaşdyrylyşy bilen tanyşdylar.

Gepleşikleriň dowamynda taraplar häzirki zaman telewideniýesini we radiosyny döwrebaplaşdyrmak, redaksiýa işlerini sanly ulgama geçirmek ýaly möhüm ugurlary ara alyp maslahatlaşdylar. Ýewropaly hünärmenler öz önümçilik we tehnologik tejribeleri barada giňişleýin maglumat berdiler. Şeýle-de, häzirki wagtda köpçülikleýin habar beriş serişdelerinde innowasion tehnologiýalary ulanmagynyň ähmiýeti barada pikir alyşdylar.

Duşuşygyň esasy böleginde türkmen wekilleri tarapyndan ýurdumyzda giňden ulanylýan «Belet» milli striming platformasynyň tanyşdyrylyşy guraldy. Portugaliýaly hünärmenler bu sanly ulgamyň gurluşyna, döwrebap dizaýnyna we maglumat gorunyň elýeterliligine ýokary baha berdiler. Esasan hem, platformanyň üsti bilen sport ýaryşlaryny we oýunlaryny göni ýaýlymda ýokary hilde görkezmek mümkinçilikleri daşary ýurtly kärdeşlerde uly gyzyklanma döretdi.

Halkara çärä gatnaşan türkmen wekiliýetiniň düzüminde Telewideniýe, radiogepleşikler we kinematografiýa baradaky döwlet komitetiniň, Daşary işler ministrliginiň, döwlet gazet-žurnallarynyň hem-de «Turkmenportal» internet neşiriniň hünärmenleri we žurnalistleri bar. Türkmen tarapy görkezilen myhmansöýerlik we medeni taýdan döredilen giň mümkinçilikler üçin ýewropaly kärdeşlerine öz minnetdarlyklaryny bildirdiler.