Türkmenistanyň ýokary synp okuwçylary taryhy hakykaty we nesilleriň arabaglanyşygyny saklamaga gönükdirilen halkara medeni-bilim taslamasyna gatnaşarlar. Bu barada Russiýa Federasiýasynyň ýurtda işleýän diplomatik wekilhanasynyň ýolbaşçysynyň metbugatda çap edilen makalasynda bellenilýär. Dünyäniň 18 döwletiniň ýaşlaryny birleşdirýän bu çäre ýaş nesilleriň arasyndaky dostlukly gatnaşyklary berkitmekde täze bir ädim bolar.

Iki hepdelik taryhy syýahat taryhyň iň agyr urşunyň başlanmagynyň 85 ýyllyk şanly senesiniň öňüsyrasynda badalga alar. Taslamanyň guramaçylarynyň bellemegine görä, bilelikdäki taryhy sarpalamak we umumy ýeňişleri bellemek ýurtlaryň arasyndaky ynamdar gatnaşyklaryň esasy görkezijisidir. Şeýle hem taraplar adamzadyň taryhynda möhüm yz galdyran beýleki şanly seneleri, şol sanda ilkinji kosmos uçuşynyň 65 ýyllygyny hem bilelikde belleýärler.

Bu ugurdaky başlangyç ilkinji gezek 2021-nji ýylda Russiýanyň we Belarusyň parlamentara geňeşleriniň ýolbaşçylary tarapyndan öňe sürülipdi. Häzirki wagtda taslama halkara derejesine çykyp, ýaşlaryň taryha bolan sarpasyny artdyrmak üçin täsirli gurala öwrüldi. Şu ýylky meýilnama laýyklykda, ýörite otly gatnavy Belarus Respublikasynyň 8 sany iri şäherini we Russiýa Federasiýasynyň 5 sany taryhy mekanyny öz içine alar.

Taslama gatnaşmaga hukuk gazanan 10-njy synpyň okuwçylary syýahat döwründe taryhy ýodalar bilen tanyşmakdan başga-da, dürli halklaryň medeniýetini öwrenerler. Syýahat medeni gurşawy giňeltmäge, talyplaryň dünýägaraşyny ösdürmäge hem-de geçmişiň gahrymançylykly sahypalaryna hormat goýmaga ýardam edýär. Şeýle çäreler ýaşlaryň arasynda medeniýetara dialogy ösdürmekde uly ähmiýete eýedir.