Türkmenistanyň Döwlet migrasiýa gullugynyň wekilleri Brýusselde Praga prosesiniň çäklerinde guralan zähmet migrasiýasynyň meseleleri boýunça geçirilen iki günlük halkara maslahata işjeň gatnaşdylar. Çärä Ýewropa Bileleşiginiň institutlarynyň, şol sanda Ýewropa Komissiýasynyň we Migrasiýa syýasatyny ösdürmek boýunça halkara merkeziniň (ICMPD) bilermenleri hem-de dürli döwletleriň wekilleri gatnaşdylar. Maslahatyň esasy maksady häzirki zaman migrasiýa meýillerini ara alyp maslahatlaşmak we tejribe alyşmakdan ybarat boldy.

Duşuşyklaryň dowamynda türkmen tarapy migrasiýa amallaryny düzgünleşdirmek boýunça milli tejribesini beýan edip, ulgama innowasion çemeleşmeleri we sanly çözgütleri ornaşdyrmaga aýratyn üns berdi. Türkmenistanyň migrasiýa gullugy tarapyndan elektron hyzmatlaryny ösdürmek, pudagara hyzmatdaşlygy kämilleşdirmek we döwlet düzümleriniň arasyndaky maglumat alyşmagy çaltlandyrmak boýunça durmuşa geçirilýän işler giňişleýin düşündirildi.

Maslahata gatnaşyjylara ýurdumyzda migrasiýa düzüminiň yzygiderli döwrebaplaşdyrylýandygy barada maglumat berildi. Bu çäreler sanly tehnologiýalary ulanmak arkaly migrasiýa gözegçiligini netijeli guramaga we raýatlara hyzmat ediş hilini ýokarlandyrmaga gönükdirilendir. Bilermenler we gatnaşyjy döwletleriň wekilleri Türkmenistanyň bu ulgamdaky institusional ösüşine we gazanan netijelerine ýokary baha berdiler.

Bu halkara maslahat Türkmenistanyň migrasiýa syýasatynda halkara ölçeglere ygrarlydygyny we dünýä tejribesini öz içine alýan kämil ulgamy kemala getirýändigini ýene bir gezek subut etdi. Gatnaşyjy taraplar geljekde hem migrasiýa dolandyryşy we zähmet migrasiýasy babatynda hyzmatdaşlygy ösdürmek barada özara pikir alyşdylar.