Türkmenistanyň Ýaponiýadaky ilçisi A. Baýramowyň Ýaponiýanyň Parlamentiniň Wekiller palatasynyň Daşky gurşaw boýunça komitetiniň başlygy Takuma Miýaji bilen geçiren duşuşygynda ikitaraplaýyn hyzmatdaşlygyň häzirki ýagdaýy seljerildi. Duşuşyk parlamentara gatnaşyklarynyň iki döwletiň arasyndaky syýasy we ykdysady baglanyşyklary berkitmekdäki ornuna bagyşlandy. Türkmen diplomaty ýapon tarapyna döwletara hyzmatdaşlygy ösdürmäge goşýan şahsy goşandy we işjeňligi üçin minnetdarlyk bildirdi.

Gepleşikleriň dowamynda syýasy partiýalaryň arasyndaky hyzmatdaşlygy ösdürmegiň ähmiýeti barada pikir alşyldy. Hususan-da, Türkmenistanyň Demokratik partiýasy bilen Ýaponiýanyň Liberal Demokratik partiýasynyň arasynda göni gatnaşyklary ýola goýmak başlangyjy goldanyldy. Bu ädim kanun çykaryjylyk işinde tejribe alşylmagyna we iki ýurduň syýasy ulgamlarynyň arasynda dostlukly köprüleriň gurulmagyna hyzmat eder diýlip hasaplanýar.

Taraplar daşky gurşawy goramak, oba hojalygy we atçylyk pudagy ýaly ugurlarda amaly hyzmatdaşlygy çuňlaşdyrmak meselelerini hem ara alyp maslahatlaşdylar. Ýaponiýanyň daşky gurşawy goramak we ekologiýa tehnologiýalary babatdaky tejribesiniň Türkmenistan üçin gyzyklydygy bellenildi. Şeýle hem atçylyk pudagynda hünärmenleriň taýýarlanmagy we özara tejribe alşylmagy boýunça täze meýilnamalar barada pikir alşyldy.

Duşuşygyň ahyrynda taraplar parlamentara dostluk toparlarynyň işini işjeňleşdirmegiň zerurdygyny tassykladylar. Geçirilen netijeli gepleşikler türkmen-ýapon gatnaşyklarynyň täze many-mazmun bilen baýlaşdyrylýandygynyň nobatdaky subutnamasy boldy. Bu duşuşyk iki ýurduň arasyndaky köptaraply gatnaşyklaryň strategik häsiýete eýedigini ýene-de bir gezek tassyklady.