Türkmenistanyň hemişelik Bitaraplygynyň 30 ýyllygyna bagyşlanyp Aşgabatda geçirilen halkara forumda Gazagystanyň Prezidenti Kasym-Žomart Tokaýew forumyň ýokary derejede guralandygy hem-de bildirilen mähirli garşylama üçin Türkmenistanyň Prezidenti Serdar Berdimuhamedowa hoşallyk bildirdi.

Gazagystanyň Baştutany çykyşynda Türkmenistanyň alyp barýan oňyn bitaraplyk syýasatynyň Ýewraziýa giňişliginde durnuklylygy saklamakda we ösüşi höweslendirmekde netijeli mehanizme öwrülendigini belledi. Şeýle syýasatyň ýurda halkara derejesinde uly abraý getirmeginde türkmen halkynyň Milli Lideri, Halk Maslahatynyň Başlygy Gurbanguly Berdimuhamedowyň aýratyn goşandynyň bardygy nygtaldy.

Kasym-Žomart Tokaýew BMG-niň Baş Assambleýasynyň degişli çözgüdine laýyklykda Halkara parahatçylyk we ynanyşmak ýylyny yglan etmek başlangyjyna hem-de Türkmenistanyň yzygiderli parahatçylyk dörediji diplomatiýasyna ýokary baha berdi. Häzirki döwürde global dartgynlylygyň ýokarlanýandygyny nazara alyp, dialogy giňeltmegiň, hyzmatdaşlygy berkitmegiň we halkara hukugyna daýanmagyň aýratyn ähmiýetli bolup durýandygyny aýtdy.

Gazagystan Türkmenistanyň köptaraplaýyn hyzmatdaşlygy ösdürmäge gönükdirilen tekliplerini, şol sanda BMG-niň Parahatçylyk we Bitaraplyk uniwersitetini döretmek başlangyjyny goldaýandygyny beýan etdi. Şeýle-de BMG ulgamyny döwrebaplaşdyrmagyň we Baş Assambleýanyň ornuny has-da güýçlendirmegiň zerurdygyny nygtady.

Gazag Lideri Merkezi Aziýa ýurtlarynyň sebit hyzmatdaşlygynyň üstünlikli nusgasyny görkezýändigini, ulag-logistika baglanyşyklaryny ösdürmäge aýratyn ähmiýet berýändigini belledi. Mundan başga-da, suw howpsuzlygyny üpjün etmek, Aral hem-de Hazar deňizleriniň ekoulgamlaryny goramak boýunça bilelikdäki çäreleriň zerurdygyna ünsi çekdi.

Çykyşynyň ahyrynda Kasym-Žomart Tokaýew Aşgabat forumynyň halkara parahatçylygy we özara ynamy pugtalandyrmakda möhüm ädim boljakdygyna ynam bildirdi hem-de türkmen halkyna mundan beýläk-de gülläp ösüş arzuw etdi.