Şweýsariýanyň Ženewa şäherinde guralan Halkara Zähmet Maslahatynyň 114-nji sessiýasynyň çäklerinde Türkmenistanyň resmi wekilleri çykyş etdiler. Dünýä derejesindäki bu forumda ýurdumyzyň zähmet we ilaty durmuş taýdan goramak ministri M.Sylapow hem-de Kärdeşler Arkalaşyklarynyň Milli merkeziniň ýolbaşçysy O.Berdiliýewa döwletimiziň zähmet bazaryny kämilleşdirmek baradaky tejribesi bilen tanyşdyrdylar.

Degişli ministrligiň ýolbaşçysy öz hasabatynda bu gezekki sessiýanyň esasy mowzugy bolan mynasyp zähmet şertlerini emele getirmekde emeli aň ulgamlaryndan peýdalanmak meselesine ünsi çekdi. Häzirki wagtda ykdysadyýetiň ähli ugurlaryna sanly ulgamy, täze innowasiýalary we kompýuter tehnologiýalaryny ornaşdyrmagyň Türkmenistanyň durmuş syýasatynyň ileri tutulýan ugurlarynyň biridigi aýratyn bellenildi.

Çykyşda bellenilişi ýaly, täze tehnologiýalary ulanmakda döwletimiz adama gönükdirilen ýörelgelere esaslanýar. Bu bolsa tehnologik ösüşiň diňe bir iş önümçiligini ýokarlandyrmak bilen çäklenmän, eýsem hünärmenleriň başarnyklaryny ösdürmäge, zähmet goraglylygyny üpjün etmäge hem-de jemgyýetimiziň durmuş taýdan abadançylygyny pugtalandyrmaga şert döredýändigini subut edýär.

Kärdeşler arkalaşyklarynyň ýolbaşçysy öz gezeginde Halkara Zähmet Guramasy we Zähmetkeşleriň işi boýunça býuro (ACTRAV) bilen zähmet gatnaşyklaryny döwrebaplaşdyrmak ugrundaky gatnaşyklara ýokary baha berdi. Bilelikdäki taslamalaryň esasynda işgärleriň hukuklaryny goramak, gender deňligini üpjün etmek, ýaşlary iş bilen üpjün etmek we zähmet ülňülerini halkara kadalara laýyk getirmek boýunça uly işleriň alnyp barylýandygy mälim edildi.